रुपन्देही । कोरोना सङ्क्रमण फैलिँदै गएपछि सिद्धार्थनगरमा जारी गरिएको बन्दाबन्दीको अवधि थपिएको छ । सिद्धार्थनगर नगरपालिकाले भदौ ५ गतेसम्म बन्दाबन्दी घोषणा गरेकोमा जिल्ला प्रशासनको निर्णयबमोजिम ७ गतेसम्म पुर्याइएको थियो ।
नगरपालिकाको कोरोना भाइरस उपचार, रोकथाम, नियन्त्रण समितिले भदौ १४ गते राति १२ बजेसम्म बन्दाबन्दी कायम गर्ने निर्णय गरेको नगरप्रमुख हरिप्रसाद अधिकारीले जानकारी दिए । बन्दाबन्दीको अवधिमा स्वास्थ्य सेवा, दमकल, सरसफाइ तथा अन्य अत्यावश्यक सेवाहरू सञ्चालन हुने उनले जानकारी दिए ।
नगरपालिकाका अनुसार स्वास्थ्यसम्बन्धी सबै कार्यहरु, दमकल, विद्युत, सरसफाइ, खानेपानी र अत्यावश्यक सेवा सञ्चालन गर्ने जनप्रतिनिधि, कर्मचारीहरूले प्रयोग गर्ने सवारी साधनको साथमा परिचयपत्र अनिवार्य हुनुपर्नेछ ।
त्यस्तै खाद्यान्न, तरकारी, फलफूल, दूध तथा दूधजन्य पदार्थहरूको बिक्री वितरण आवश्यक दूरी कायम गरी बिहान छ बजेदेखि नौ बजेसम्म र साँझ पाँच बजेदेखि सात बजेसम्म सञ्चालन हुने नगरपालिकाले जनाएको छ ।
वि.सं.२०७७ भदौ ७ आइतवार १३:४३ मा प्रकाशित
