कपिलवस्तु । कोरोना संक्रमण नियन्त्रणका लागि जिल्लामा १ हप्ताका लागि निषेधाज्ञा थप गर्ने जिल्ला प्रशासन कार्यालयले निर्णय गरेको छ । आइतबार तौलिहवास्थित जिल्ला प्रशासन कार्यालयमा प्रमुख जिल्ला अधिकारी दिर्घ नारायण पौडेलको अध्यक्षतामा बसेको जिल्ला कोरोना विपद् व्यवस्थापन समितिको बैठकले यस्तो निर्णय गरिएको हो ।
दैनिकजसो कोरोना संक्रमितको संख्या बढिरहेककाले कारण बाध्यभइ निषेधाज्ञा थप गर्नु परेको प्रमुख जिल्ला अधिकारी पौडेलले बताए । स्थानीय प्रशासन ऐन २०२८ को दफा ६ (३) र संक्रामक रोग ऐन २०२० को दफा २ अनुसार भाद्र १५ गते राती १२ बजे सम्मका लागि जिल्लामा निषेधाज्ञा जारी गरिएको प्रमुख जिल्ला अधिकारी दिर्घ नारायणपौडेलले बताए ।
जिल्लामा कोरोना संक्रमणकै कारण २ जनाको मृत्यु भइसकेको र दैनिकजसो संक्रमितको संख्या बढ्दो क्रममा रहेका कारण संक्रमण फैलन नदिन बाध्यभइ निषेधाज्ञा जारी गर्नु परेको प्रजिअपौडेलले बताए । निषेधाज्ञा जारी अवधिभर अतिआवश्यक सेवाका पसल तथा सवारी साधनबाहेक सबै बन्द हुने जनाइएको छ । मेडिकल, पानी, दूधजस्ता वस्तु बाहेक सबै पसल व्यवसाय बन्द गर्ने निर्णय गरिएको छ ।
उद्योग तथा कलकारखाना भने स्वास्थ्य मन्त्रालयले जारी गरेको स्वास्थ्य निर्देशिका अनुसार सुरक्षाको सर्तकता अपनाएर संचालन गर्न सकिने जिल्ला प्रशासन कार्यालयले जनाएको छ । यसै गरी बैंक तथा वित्तिय संस्था पनि स्वास्थ्य निर्देशिकाअनुसार सुरक्षा सतर्कता अपनाएर न्यून कर्मचारीबाट दैनिक बिहान ८ बजे देखि १० बजेसम्म संचालन गर्न जिल्ला प्रशासन कार्यायलले निर्देशन गरेको छ ।
दमकल, एम्बुलेन्स,शव बाहन,दूध, खानेपानीका गाडीबाहेक अन्य सबै निजी तथा भाडाका सवारी साधान संचालनमा पूर्ण रोक लगाइएको छ । राजमार्ग भएर गुड्ने गाडिहरु जिल्लामा नरोकिने गरी भने चल्न पाउने छन् ।
तरकारी र खाद्यान्न खरिदका लागि हरेक दिन बिहान ८ बजे देखि १० बजे सम्मको समय तोकिएको जिल्ला प्रशासन कार्यालयले जनाएको छ ।
वि.सं.२०७७ भदौ ७ आइतवार १७:४४ मा प्रकाशित
