काठमाडौँ । देशभर थप ८८५ जनामा कोरोना भाइरस संक्रमण पुष्टि भएको छ । स्वास्थ्य तथा जनसंख्या मन्त्रालयलका अनुसार योसँगै नेपालमा हालसम्म कोरोना संक्रमितको संख्या ३४ हजार ४१८ पुगेको छ ।
पछिल्लो २४ घण्टामा जम्मा १३ हजार २५३ पीसीआर परीक्षण गरिएको मन्त्रालयका प्रवक्ता प्राडा जागेश्वर गौतमले आज आयोजित नियमित पत्रकार सम्मेलनमा जानकारी दिए । जसमा ८८५ जनामा संक्रमण देखिएको उनले बताए ।
यसैगरी आज ३८५ जना कोरोना सङ्क्रमण निको भएर घर फर्किएका छन् । यो सँगै कोरोना संक्रमण निको हुनेको सङ्ख्या जम्मा १९ हजार ५०४ पुगेको उनले बताए ।
देशभर हाल १४ हजार ७३९ जना आइसोलेशनमा रहेको मन्त्रलयले जनाएको छ । त्यस्तै देशभरका क्यारेन्टिनहरुमा हाल ९ हजार ८३२ जना रहेका छन् ।
यस्तै कोरोना संक्रमणबाट थप ११ जनाको मृत्यु भएको स्वास्थ्य तथा जनसंख्या मन्त्रालयले औपचारिक रुपमा पुष्टि गरेको छ । पछिल्लो २४ घण्टामा मृत्यु हुनेमा २ जना महिला र ९ पुरुष रहेका छन् । मृत्यु हुने महिलामा मोरङ र भक्तपुरका एक एक जना रहेका छन् ।
त्यस्तै मृत्यु हुने पुरुषमा महोत्तरीका ३ जना, कैलाली र बाराका २(२ जना तथा बाँके र काठमाडौँ एक जना रहेको मन्त्रालयका प्रवक्ता डा. जागेश्वर गौतमले जनाकारी दिएका छन् । योसँगै नेपालमा कोरोना संक्रमणबाट मृत्यु हुनेको संख्या १७५ पुगेको छ ।
वि.सं.२०७७ भदौ १० बुधवार १६:३५ मा प्रकाशित
