धनकुटा । साँगुरीगढी गाउँपालिकाले कोरोना भाइरस (कोभिड–१९)को मारमा परेका होटल व्यवसायीलाई नवीकरण शुल्कमा छुट दिएको छ।
कोभिड–१९ को महामारीबाट व्यवसायीलाई परेको असर न्यूनीकरणका लागि नवीकरणमा २५ प्रतिशत छुट दिने निर्णय गरिएको गाउँपालिकाका अध्यक्ष कुमारजंग याक्खाले जानकारी दिए।
निजी क्षेत्रका व्यवसायीलाई राहत हुने गरी सानाठूला व्यवसायी सबैलाई कर छुट गरिएको याक्खा भनाइ छ। कोरोना महामारीको सबैभन्दा असर पर्यटन तथा होटल व्यवसायलाई परेको छ ।
यसलाई मध्यनजर गर्दै गाउँपालिकाले नवीकरण शुल्कमा छुट दिएपछि केही राहत मिलेको होटल एसोसियशनका भेंडेटारका अध्यक्ष जितेन्द्र रुम्दाली राईले बताए ।
साँगुरीगढी गाउँपालिकाको भेडेटारमा मात्रै साना ठूला गरी १५० वटा होटल रहेका छन्। यस्तै, नमस्ते झरना, नाम्जे लगायतका क्षेत्रमा करिब १०० होटल रहेका छन् ।
प्रदेश १ सरकारले साँगुरीगढी गाउँपालिकालाई पर्यटकीय गाउँपालिका घोषणा गरेपछि यो क्षेत्रमा होटल व्यवसायमा आकर्षण बढेको थियो।
वि.सं.२०७७ भदौ १२ शुक्रवार ०८:१४ मा प्रकाशित