डोटी । जिल्ला प्रशासन कार्यालय डोटीले एक हप्ताका लागि जिल्लाभरी निषेधाज्ञा जारी गरेको छ । आइतबार राति १२ बजेदेखि लागू हुने गरी एक हप्ताका लागि जिषेधाज्ञा जारी गरिएको हो ।
कोरोना संक्रमण महामारीको रुपमा फैलन थालेपछि निषेधाज्ञा जारी गर्नु परेको बताइएको छ । जिल्ला कोभिड–१९ संकट व्यवस्थापन केन्द्रको निर्णय तथा सिफारिसमा जिल्ला प्रशासन कार्यालयले निषेधाज्ञा जारी गरेको प्रमुख जिल्ला अधिकारी भीमप्रसाद भट्टराईले बताए ।
भदौ २१ गते राति १२ बजेसम्मको लागि निषेधाज्ञा गरिएको प्रशासनले जनाएको छ । सो अवधिमा अत्यावश्यक सेवा तथा वस्तु बाहेकका अन्य सबै प्रकारका उद्योग, व्यापार, व्यवसाय संचालन गर्न नपाइने बताइएको छ ।
अत्यावश्यक सामग्री लगायतका मालवाहक ढुवानीका सवारी साधन, स्वास्यकर्मी तथा सुरक्षा निकायले प्रयोग गर्ने सवारी साधन बाहेक अन्य सबै सवारी साधन जिल्ला प्रवेश गर्न निषेध गरिएको छ भने जिल्ला भित्र संचालन हुने सबै प्रकारका निजी तथा सार्वजनिक यात्रुबाहक सवारी साधनमा समेत रोक लगाइएको छ ।
कुनै पनि मेला, पर्व, महोत्सब, जात्रा संचालन गर्न, मानिसहरु भेलारजम्मा हुन, भीडभाड गर्न, सभा जुलुस गर्नमा समेत निषेध गरिएको छ । यदि आदेशको उल्लंघन गर्ने वा आदेशको पालना गर्ने गराउने कार्यमा अबरोध गर्ने उपर संक्रामक रोग ऐन, २०२० तथा अन्य प्रचलित कानुन बमोजिम कारवाही हुने समेत भनिएको छ । आवश्यकतालाई मध्यनजर गर्दे निषेधाज्ञालाई बढाउन समेत सकिने बताइएको छ ।
वि.सं.२०७७ भदौ १४ आइतवार १२:०९ मा प्रकाशित
