काठमाडौं । प्रधानमन्त्री केपी शर्मा ओलीले इन्द्रजात्रा जस्ता पर्व नेपालका सांस्कृतिक पूँजी भएको बताउनु भएको छ । विभिन्न जाति, समुदाय र भूगोलमा बसोबास गर्ने नेपालीले मनाउने यस्ता चाडपर्वले एकताको सूत्रमा बाँधेको प्रधानमन्त्रीले बताउनुभएको हो ।
इन्द्रजात्राका अवसरमा एक शुभकामना सन्देश दिनुहुँदै प्रधानमन्त्रीले नेपालीबीचको एकतालाई कमजोर पार्न विभिन्न समयमा भएका दुष्प्रयासलाई नेपालीले यस्तै सांस्कृतिक आलोकमा परास्त गर्दै आएको पनि बताउनुभएको छ ।
सरकारले यस्ता सांस्कृतिक पर्वको संरक्षण र सम्बर्दन गर्ने नीति लिएको बताउनुहुँदै उहाँले सन्देशमा भन्नुभएको छ, ‘नेपालीहरु जातीय, धार्मिक र सांस्कृतिक विविधताका बीच एकताबद्ध रहेको सन्देश प्रवाह गरेका छौंँ ।’
सन्देशमा अन्तरसांस्कृतिक सद्भावको समुन्नत सन्देश प्रवाह गर्ने इन्द्रजात्रा जस्ता पर्व नेपालको सांस्कृतिक पूँजी रहेको उल्लेख गर्नुहुँदै उहाँले सबल राष्ट्रिय एकताको यो सांस्कृतिक आधारशिला नेपालीका लागि गौरवको विषय भएको उल्लेख गर्नुभएको छ ।
सन्देशमा प्रधानमन्त्रीले कोभिड–१९ महामारीका दुष्प्रभावलाई छिचोलेर सबल राष्ट्रिय अर्थतन्त्र, सुखी जनजीवन र समृद्ध राष्ट्र निर्माणको अभिभारा पूरा गर्न सबैलाई आह्वान पनि गर्नुभएको छ ।
कोरोना महामारीबाट सुरक्षित भई समृद्ध नेपाल–सुखी नेपालीको आकांक्षालाई पूरा गर्ने सरकारको अग्रसरतामा साथ दिन सबैलाई प्रधानमन्त्रीले आग्रहसमेत गर्नुभएको छ ।
वि.सं.२०७७ भदौ १६ मंगलवार १२:१७ मा प्रकाशित
