जनकपुरधाम । बाख्रा चराउन गएकी एक १५ वर्षीया किशोरी बलात्कृत भएकी छन्। गणेशमान चारनाथ नगरपालिका-८ की बालिकालाई दुई पुरुषले बलात्कार गरेका हुन् ।
भदौ १५ गते ती किशोरी चारनाथ खोला नजिकै बाख्रा चराउन पुगेकी थिइन्। सोही बेला मास्क लगाएका दुई पुरुषले पालैपालो मुख थुनेर बलात्कार गरेको पीडितका आफन्तले जानकारी दिए ।
हिजो साँझ प्रादेशिक अस्पताल जनकपुर ल्याएर पीडित बालिकाको स्वास्थ्य परीक्षण गराएको छ। घटनालगत्तै पीडित परिवारले ईलाका प्रहरी कार्यालय ढल्केबरलाई जानकारी गराएपनि घटनामा संलग्न व्यक्तिहरु अझै पक्राउ पर्न सकेका छैनन् ।
प्रहरी निरीक्षक तीर्थ कार्कीले घटनाको छानविनका लागि तीन जनालाई नियन्त्रणमा लिएको जानकारी दिए । उनले भने, ‘उनीहरुको संलग्नताबारे खुलिसकेको छैन, तर उनीहरु घटना अगाडी किशोरी नजिक गएको कुरा खुलेको छ, अनुसन्धान गरिरहेका छौं।’
वि.सं.२०७७ भदौ १८ बिहीवार १३:२४ मा प्रकाशित
