काठमाडौं । दशैंका लागि काठमाडौं उपत्यकामा बिक्री गर्न सरकारी स्वामित्वको खाद्य व्यवस्था तथा व्यापार कम्पनीले खसी बोका र च्याङग्रा खरिद गर्ने तयारी गरेको छ ।
घटस्थापनासम्म काठमाडौं ल्याउने गरी १४ सय च्याङग्रा र १६ सय वटा खसी बोका खरिद गर्ने गरी तयारी गरिएको कम्पनीकी सूचना अधिकारी शर्मिला न्यौपाने सुवेदीले जानकारी दिनुभयो ।
उहाँले कम्पनीको वार्षिक कार्यक्रममा उक्त परिमाणको च्याङग्रा र खसी बोका आयात गर्न ५ करोड ९९ लाख ८६ हजार रुपैयाँ बजेट छुट्याइएको बताउनुभयो ।
यसवर्ष मुस्ताङबाट १४ सय च्यांग्रा तथा दाङको तुल्सीपुर र मकवानपुरको हेटौंडाबाट १६ सय वटा खसी किन्ने कम्पनीको योजना रहेको छ ।
कम्पनीले खरिद गर्ने च्याङग्रा तथा खसी बोकाको मुल्य सम्बन्धित जिल्लाका प्रमुख जिल्ला अधिकारीको संयोजकत्वमा रहने मूल्य निर्धारण समितिको सिफारिस अनुसार हुनेछ । गतवर्ष दशैंमा संस्थानले ५ सय खसी बोका तथा च्याङग्रा खरिद गरेर सहुलियत मूल्यमा बिक्री गरेको थियो ।
वि.सं.२०७७ भदौ २८ आइतवार १९:२३ मा प्रकाशित
