काठमाडौं । बागमती प्रदेश सरकारले १२ गाउपालिकालाई खरको छानामुक्त बनाउने भएको छ ।
प्रदेश सरकारको भौतिक पूर्वाधार विकास मन्त्रालयले आ.व. २०७७/७८ मा प्रदेशभरीका गाँउपालिकामध्ये मानव विकास सूचकाङ्कमा सबैभन्दा कमअङ्क भएका १२ गाँउपालिकालाई खरको छानामुक्त गराएर टिनको छानामा रुपान्तरण गर्ने भएको हो ।
चुहिने छानो, आगलागी, हावाहुरी र विपद् बाट जनतालाई जोगाउन बागमती प्रदेश सरकारले ४ करोड रूपैया यसै आ.व. मा विनियोजन गरेको भौतिक पूर्वाधार विकास मन्त्री रामेश्वर फुल्यालले जानकरी दिनुभयो ।
उहाँका अनुसार छनोटमा परेका लाभग्राही परिवारलाई टिनको छाना उपलब्ध गराउन प्रत्येक गाँउपालिकालाई २५ लाखका दरले रकम उपलब्ध गराउने व्यवस्था मिलाईएको छ ।
पहिलो हुने निर्वाचित हुने निर्वाचन प्रणाली बमोजिम निर्वाचित हुने सम्बन्धित निर्वाचन क्षेत्रको प्रदेश सभा सदस्यको संयोजकत्वमा अनुगमन तथा मुल्याङ्कन समिति र सम्बन्धित गाँउपालिका अध्यक्षको अध्यक्षतामा लाभग्राही र निवेदक छनौट समिति रहने व्यवस्था “खरको छानोमुक्त बागमती प्रदेश कार्यक्रम सञ्चालन मापदण्ड २०७७“ मा गरिएको मन्त्री फुल्यालले जानकारी दिनुभयो
यी हुन् खरको छानोमुक्त बागमती प्रदेश कार्यक्रम अन्तर्गत पर्ने गाँउपालिकाहरु
घ्याङलेख गाँउपालिका, सिन्धुली
फिक्कल गाँउपालिका, सिन्धुली
मरिण गाँउपालिका, सिन्धुली
हरिहरपुरगढी गाँउपालिका, सिन्धुली
गौरीशंकर गाँउपालिका, दोलखा
बिगु गाँउपालिका, दोलखा
पाँचपोखरी थाङ्पाल गाँउपालिका, सिन्धुपाल्चोक
हेलम्बु गाँउपालिका, सिन्धुपाल्चोक
नौकुण्ड गाँउपालिका, रसुवा
आमाछोदिङमो गाँउपालिका, रसुवा
खनियाबाँस गाँउपालिका, धादिङ
रुविभ्याली गाँउपालिका, धादिङ
वि.सं.२०७७ भदौ २८ आइतवार २१:३५ मा प्रकाशित
