मकवानपुर । बागमती प्रदेश सरकारले चितवनमा निर्माणाधीन अवस्थामा रहेको गौतम बुद्ध अन्तर्राष्ट्रिय क्रिकेट रंगशालाका तत्काल ३ करोड रुपैयाँ उपलब्ध गराउने भएको छ ।
बुधबार बसेको मन्त्रिपरिषद्को बैठकले धुर्मुस–सुन्तली फाउन्डेसनलाई रंगशाला निर्माणका लागि ३ करोड रुपैयाँ उपलब्ध गराउने भएको हो ।
प्रदेश सरकारको ससर्त अनुदान अन्तर्गत् आर्थिक वर्ष २०७७/०७८ को अनुदान रकम उपलब्ध गराउन लागिएको सरकारका प्रवक्ता, आर्थिक मामिला तथा योजनामन्त्री कैलाश ढुङ्गेलले जानकारी दिए ।
उनका अनुसार कोरोना संक्रमणको अवस्थामा पनि निरन्तर निर्माण गरिरहेको भन्दै काम सुचारु गर्न सहज होस् भनेर सहयोग गर्न लागिएको हो । ‘लकडाउनको समयमा समेत धमाधम काम भइरहेको छ ।
रंगशालाको काम अगाडि बढाउन आर्थिक अभाव नहोस् भनेर तत्काल सहयोग रकम उपलब्ध गराउन लागेका हौं ।’ ढुङ्गेलले भने । उनले यसै आर्थिक वर्षमा थप रकम समेत सहयोग गर्ने गरी बजेट विनियोजन गरेको बताए ।
बैठकले प्रदेश सुशासन केन्द्र स्थापना र सञ्चालन आदेश २०७७, प्रदेश भ्रमण खर्च नियमावली, प्रदेश पूर्वाधार विकास साझेदारी नियमावलीको दोस्रो संशोधन स्वीकृत गर्ने निर्णय समेत गरेको छ ।
वि.सं.२०७७ असोज १ बिहीवार १२:३७ मा प्रकाशित