काठमाडौं । काठमाडौं उपत्यकामा तरकारीको मूल्य अस्वभाविक बढेको जनगुनासो आएपछि बजार अनुगमनलाई तीव्र पारिएको छ ।
सोमबार बिहान महानगरको उपभोक्ता हित संरक्षण समितिका पदाधिकारीले नक्सालस्थित तरकारी बजारको अनुगन गरेको छ । अनुगमन टोली आएको खवर सुनेपछि तरकारी व्यापारीहरुको भागदौड मच्चिएको थियो । तरकारी बजारमा आलु र प्याजको व्यापार गर्ने किशोर पासवान त पसल छोडेरै भागे ।
बिष्णुप्रसाद सापकोटा प्रोपाइटर रहेको बिजी इन्टरप्राइजेज नाममा दर्ता भएको पसल खुल्ला छोडेर पासवान भागेका हुन् । लामो समय कुर्दा पनि व्यापारी नआएपछि सोधपुछका क्रममा उनी भागेको पत्ता लागेको थियो । सापकोटा नक्साल तरकारी तथा फलफुल व्यवस्थापन समितिका अध्यक्ष समेत हुन् ।
अनुगमन टोली पुगेपछि पसल नं. ४०४१ क शिवलाल शाह पनि पसल छोडेर भागेका थिए । अनुगमन टोली देखेपछि नजिकैका अर्का व्यापारीले भने प्रति किलो ६० रुपैयाँमा प्याज बेच्न थाले । उनकोमा बाँकी भएको करीब २० किलो प्याज छिनभरमै विक्री भएको थियो ।
अनुगमनका क्रममा बढी मूल्य लिनुका साथै अन्य तरकारी बजारमाजस्तै खरिद बिक्री बिल र दर्ताको मुख्य समस्या देखिएको टोलीमा सहभागी एक सदस्यले बताए । कति व्यापारीले तरकारीमा म्याद लेवल हुन्छ भन्ने नै आफूलाई थाहा नभएको बताएका थिए ।
नक्सालमा सोमबार बिहानै उत्पादन र उपभोग्य मिति केरमेट भएको प्याकेजिङ् गरिएको चाउमिन वितरण गरिरहेको बा १८ च ९९०१ नं. को सवारी साधन पनि नियन्त्रणमा लिएको छ ।
अनुगमन टोलीले ज्ञानेश्वरमा रहेको कुमारी मिल र मनोरमा ज्ञानेश्वर फ्लोर एण्ड राइस मिलमा पनि अनुगमन गरेको थियो । त्यसक्रममा टोलीले लेवल नभएका सबै खाद्यबस्तु बिक्रीमा रोक लगाइएको छ ।
महानगरको कृषि बिभागको नेतृत्वमा भएको अनुगमनमा पशु सेवा बिभाग, वाणिज्य आपूर्ति तथा उपभोक्ता संरक्षण बिभाग, उपभोक्ता अधिकार अनुसन्धान मञ्चका प्रतिनिधि सहभागी थिए ।
वि.सं.२०७७ असोज ५ सोमवार १६:४६ मा प्रकाशित
