काठमाडौं । झण्डै सात महिनादेखि बन्द फिल्म हलहरु आगामी दशैंबाट खोल्ने तयारी भएको छ ।
सरकारले तोकेका स्वास्थ्य मापदण्डहरु पालना गर्ने गरी हल खोल्न दिनुपर्ने प्रस्ताव चलचित्र विकास बोर्ड सहितका निकायहरुले सरकार समक्ष राखेका छन् । प्रस्तावमा सरकार समेत सकरात्मक रहेको बताइएको छ ।
यहि साता चलचित्र विकास बोर्डका अध्यक्ष सहितको संकट व्यवस्थापन केन्द्र (सिसिएमसि)सँगको छलफलमा दशैंबाट पुनः हल सञ्चालन गर्नेबारे छलफल भएको थियो ।
सिसिएमसिका संयोजक समेत रहेका रक्षामन्त्री ईश्वर पोखरेलले दशैंदेखि हल खोल्ने आन्तरिक तयारी गर्न बोर्डलाई सुझाव दिनुभएको हो । छलफलपछि विकास बोर्डले पनि आन्तरिक तयारी पुरा भएको बताउदै निर्माताहरुलाई फिल्म रिलिजको लागि तयारी रहन आन्तरिक सूचना प्रवाह गरेका छन् ।
तर संक्रमितको संख्या २५ हजार नाघेको खण्डमा लकडाउन गर्नुपर्ने स्वास्थ्य मन्त्रालयको धारणा छ । संक्रमितको संख्या झण्डै २५ हजारको छेउछाउमा पुगिसकेकोले हल खुल्ने सम्भावना भने न्यून बनेको छ । तर अब पुनः लकडाउन हुने अवस्था आएपनि आन्तरिक सुरक्षा मापदण्ड सहित सबै क्षेत्र खोल्ने तयारी भईरहेको बताइएको छ ।
दशैंबाट नै हल सञ्चालनमा ल्याउन सरकार र विकास बोर्ड सकरात्मक भए पनि निर्माताहरु नै फिल्म रिलिज गर्न आनाकानी गरिरहेका छन् । कोरोनाको त्रासका बीच दर्शकहरु फिल्म हलमा आउछन् भन्नेमा आफूहरुलाई विश्वास नरहेको एक निर्माताको भनाइ छ ।
वि.सं.२०७७ असोज १४ बुधवार १३:०७ मा प्रकाशित
