काठमाडौं । दर्ताबिनै सञ्चालित क्रसर तथा बालुवा प्रशोसन उद्योग बन्द गरिने भएको छ । अनुमति लिएर पनि मापदण्ड पूरा नगरेका उद्योगका हकमा भने लचिलो बन्न सकिने गृह मन्त्रालयले जनाएको छ ।
उद्योग, वाणिज्य तथा आपूर्ति मन्त्रालय तथा सम्बन्धित स्थानीय तहले त्यस्ता उद्योगबाट मापदण्ड पालनाको समयबद्ध कार्ययोजनासहितको प्रतिबद्धता लिई मनासिव समयअवधि दिएर मापदण्ड पूरा गरेपछि मात्र उद्योग सञ्चालन गर्न दिने निर्णय भएको छ ।
दर्ता नभई र मापदण्ड पूरा नगरी सञ्चालित क्रसर उद्योग चलाउन भने अब नपाइने मन्त्रालयका प्रवक्ता चक्रबहादुर बुढाले जानकारी दिए ।
‘मापदण्डमा केही समस्या भए त्यसलाई संशोधन प्रक्रियामा लैजाने र व्यावहारिक बनाउने निर्णय भएको छ,’ सरोकारवाला मन्त्रालयका प्रतिनिधिबीच मंगलबार गृह मन्त्रालयमा बैठकले गरेको निर्णयबारे उनले भने, ‘घाटगद्दीमा रहेका सामानको रेकर्ड राखी बिक्री गर्न दिइनेछ ।
विकास निर्माणमा असर नगरोस् भन्नेमा सचेत छौं ।’ अवैध क्रसर बन्द गराउन सरकार कठोर बन्दै गएपछि अहिले बजारमा निर्माण सामग्रीको अभाव बढेको छ । तेब्बरसम्म मूल्य तिरेर सामान किन्नुपरेको लाभग्राहीको गुनासो छ । कान्तिपुरमा खबर छ ।
वि.सं.२०७७ मंसिर २४ बुधवार ०८:१७ मा प्रकाशित