सङ्खुवासभा । चैनपुर नगरपालिकाले नगर क्षेत्रको फोहरमैला व्यवस्थापन गर्ने गरी डम्पिङ साइट (फोहोरमैला सङ्कलन केन्द्र) को स्थापना गर्ने भएको छ ।
एक हजार ७३ वर्गमिटर क्षेत्रफल जग्गामा नौ हजार ६०४ दशमलव ६ घनमिटर क्षमताको फोहरमैला विसर्जन केन्द्र निर्माण गर्ने नगरपालिकाले जनाएको छ ।
अनुमानित रु तीन करोडको लगानीमा दुई वर्षभित्रमा योजना पूरा गर्ने गरी निर्माणको काम थालनी गरिने भएको छ । चैनपुर नगरपालिकास्थित पोखरी बजार नजीक दाहालडाँडा छेउको सार्वजनिक जमीनमा फोरहमैला विसर्जन केन्द्रका लागि नगरपालिकाले वातावरणीय परीक्षणसमेत गर्ने भएको छ ।
सेमी एरोबिक लेन्ड फिल्ड साइट मोडेलमा निर्माण हुने सो केन्द्रमा सड्ने र नसड्ने गरी फोहर छुट्याएर विसर्जन गरिने वडा नं ३ का अध्यक्ष बलबहादुर अधिकारीले बताउनुभयो । सड्ने फोहरबाट प्राङ्गारिक मलसमेत उत्पादन गर्न सकिने उहाँको भनाइ छ ।
नगरपालिकाले हालै फोहरमैला व्यवस्थापन केन्द्रका लागि प्रारम्भिक वातावरणीय परीक्षण सार्वजनिक सुनुवाइ कार्यक्रमसमेत सम्पन्न गरेको छ ।
फोहरमैला व्यवस्थापन केन्द्रको वातावरणीय परीक्षणमा वायु प्रदूषण, दुर्गन्ध, पानी प्रदूषण, माटो प्रदूषण, भूमिगत जलस्रोत, व्यवसायजन्य सुरक्षा जोखिमजस्ता विषयमा परीक्षण गरिने वातावरण विज्ञ सन्देश पोखरेलले बताउनुभयो ।
केन्द्रका चैनपुर बजार, खराङ बजार, पोखरी बजार, नुनढाकी बिहीबारेलगायत शहरी क्षेत्रको फोहरमैलालाई व्यवस्थित गरिने नगरपालिकाका प्रमुख प्रशासकीय अधिकृत किरणप्रसाद ढकालले जानकारी दिनुभयो ।
वि.सं.२०७७ मंसिर २४ बुधवार १२:५७ मा प्रकाशित
