मुग । मुगुको उत्तरपूर्वी भेगमा पर्ने मुगुमकार्मारोङ गाउँपालिकाले सामुदायिक विद्यालयहरूमा जाडो बिदा नदिने निर्णय गरेको छ ।
कोरोना महामारीका कारण बन्द विद्यालय झण्डै ८ महिनापछि खुलेकाले जाडो बिदा नदिने साथै शनिबार पनि पढाइ हुने निर्णय गरिएको हो । गाउँपालिकामा रहेका १८ वटा विद्यालयहरू मंसिर १८ गते देखि सञ्चालनमा आएका छन् ।
हिउँदमा अत्यधिक हिमपात हुने मुगमकार्मारोङमा यस अघिका वर्ष पुस १५ देखि माघ १५ सम्म जाडो बिदा गर्ने गथ्र्यो । यो वर्ष कोर्स नसकिने भन्दैै गाउँपालिकाले बिदा नदिने निर्णय गरेको हो ।
सार्वजनिक बिदाका दिन पनि विद्यालय सञ्चालन गर्ने निर्णय गरिएको गाउँपालिका अध्यक्ष छिरिङक्याप्ने लामाले बताए । शनिबार पनि विद्यालय सञ्चालन हुने उनको भनाइ छ ।
अत्यधिक जाडो बढेपछि केही विद्यालय आगो बालेर तथा अन्य सावधानीका उपाय अपनाएर विद्यालय सञ्चालन भइरहेको बुद्ध माध्यमिक विद्यालयका प्रधानाध्यापक टीकाप्रसाद उपाध्यायले बताए ।
उत्तरी भागमा भारी हिमपातका कारण हिउँदको समयमा तापक्रम माइनस डिग्री सेलसिएसमा हुने गर्दछ । भने चिसो छल्नका लागि मानिसहरू जिल्ला सदरमुकाम गमगढी, जुम्ला, सुर्खेत, नेपालगञ्ज लगायतका ठाउँमा आउने गर्छन् ।
चारवटा स्थानीय तह रहेको मुगुका अन्य स्थानीय तहले पनि जाडो बिदा नगर्ने तयारी गरेका छन् ।
वि.सं.२०७७ मंसिर २६ शुक्रवार १९:२८ मा प्रकाशित
