विराटनगर । भारतबाट अवैध रुपमा भित्र्याइएको ४९ बोरो चिनीसहित मोरङ प्रहरीले ४ जनालाई पक्राउ गरेको छ ।
भन्सार छलेर ल्याएको चिनी नेपाली कम्पनीको नाम लेखिएको बोरामा पल्टी गरेर बिक्री गर्ने तयारी गरिरहेको अवस्थामा प्रहरीले ४ जनालाई पक्राउ गरेको हो ।
पक्राउ पर्नेमा मोरङको रंगेली नगरपालिका–१ बस्ने २१ वर्षीय अभिषेक कुमार साह, रंगेली नगरपालिका–२ बस्ने १७ वर्षीय दिपक कुमार मण्डल, सोही ठाउँक १९ वर्षीय अर्जुन कुमार मण्डल र १९ वर्षीय रुपेश मण्डल छन् ।
मोरङको धनपालथान गाउँपालिका वडा नम्बर ४ बस्ने सुनिल राजवंशीको गोदाम अगाडि वरण्डामा राखिएको अवस्थामा प्रहरीले चिनी बरामद गरेको हो । प्रहरीका अनुसार उनीहरुले भारतको कुवाडीबाट अवैध रुपमा भन्सार छलेर चिनी नेपाल ल्याएका थिए ।
प्रहरीले चिनी तस्करीमा संलग्न युवाहरुको साथबाट ३ वटा मोटरसाइकल पनि बरामद गरेको छ । को १८ प ५७४३ नम्बरको ग्ल्यामर, को २२ प १६४४ नम्बरको सुपर स्पिलेण्डर र को ११ प ६६५९ नम्बरको सुपर स्पिलेण्डर मोटरसाइकल बरामद भएको प्रहरीले जानकारी दिएको छ ।
वि.सं.२०७७ मंसिर ३० मंगलवार ११:४९ मा प्रकाशित