काभ्रेपलाञ्चोक । काभ्रेपलाञ्चोकको पाँचखाल नगरपालिका–३ स्थित सर्वमङ्गला क्याम्पसले निर्माण गर्न लागेको नयाँ भवनको आज (बिहीवार) एक कार्यक्रमको आयोजना गरी शिलान्यास गरिएको छ ।
वाग्मती प्रदेश सरकारको ४० लाखको लागतमा निर्माण हुन लागेको सो भवनको वाग्मती प्रदेशसभा सदस्य लक्ष्मण लम्सालले शिलान्यास गरेका हुन् ।
सो अवसरमा प्रदेश सभा सदस्य लम्सालले विद्यार्थीको शैक्षिक गुणस्तर कायम गर्नका लागि सुविधासम्पन्न भवनले ठूलो महत्व राख्ने भन्दै लक्ष्यअनुरुप समयमै निर्माण सम्पन्न गर्नुपर्नेमा जोड दिए ।
क्याम्पसको भौतिक संरचनासँगै शिक्षाको गुणस्तर वृद्धिका लागि क्याम्पस परिवारले विद्यार्थीलाई आकर्षण गराउने खालको वातावरण निर्माण गर्नुपर्नेमा जोड दिदैं उनले शैक्षिक गुणस्तर वृद्धिसँगै आकर्षक वातावरण निर्माणका लागि प्राध्यापक, अभिभावक र समाजसेवीलगायत सम्बन्धित सबै पक्षले महत्वपूर्ण भूमिका निर्वाह गर्नुपर्ने आवश्यकता औल्याए ।
क्याम्पस प्रमुख जयराम अधिकारीले शौचालयसहित तीन कोठे एकतले भवन निर्माण हुने बताए । यसअघि पनि क्याम्पस भवन मर्मतसम्भारका लागि प्रदेश सभा सदस्य लम्सालको पहलमै प्रदेश सरकारले पहिलो वर्ष २० लाख र गत वर्ष ३० लाख बजेट विनियोजन गरिएको उनले जानकारी दिए ।
वि.सं.२०७७ माघ १ बिहीवार १२:३८ मा प्रकाशित
