मोरङ । एकीकृत भन्सार जाँच चौकी विराटनगरले चालु आर्थिक वर्षको ६ महिनाको अवधिमा कूल १८ अर्ब तीन करोड २६ लाख २१ हजार राजश्व संकलन गरेको छ । सो अवधिमा भन्सारले २३ अर्ब ६ करोड ८३ लाख ६६ हजार राजश्व संकलन गर्ने लक्ष्य लिएको थियो ।
कार्यालयले लक्ष्यमा पाँच अर्ब तीन करोड ५७ लाख ४५ हजार कम संकलन गरी समग्रमा ७८ दशमलव १७ प्रतिशत प्रगति गरेको जनाएको छ । गएको वर्षमा सो अवधिमा २६ अर्ब पाँच लाख ८५ हजार राजश्व संकलन गर्ने लक्ष्यमा १५ अर्ब ८५ करोड ६१ लाख १५ राजश्व संकलन गरेको थियो । सो अवधिमा कार्यालयले लक्ष्यमा नौ अर्ब ८१ करोड २८ लाख ३६ हजार राजश्व कम संकलन गरी ६१ दशमलव ७७ प्रतिशत प्रगति गरेको थियो ।
चालु आ.वमा गएको वर्षमा सो अवधिमा संकलित राजश्वभन्दा दुई अर्ब १७ करोड ६५ लाख छ हजारले बढी राजश्व संकलन भएको कार्यालयका प्रवक्ता सन्तोष यादवले जानकारी दिए ।
उनले गएको वर्षभन्दा यस वर्ष सो अवधिमा विभागले विभिन्न शीर्षकमा कूल दुई अर्ब ६० करोड पाँच लाख ८५ हजार कम गरेर साउनदेखि पुससम्मको २३ अर्ब ६ करोड ८३ लाख ६६ हजार लक्ष्य दिएको जानकारी दिए ।
कोरोनाको महामारीका कारण आयात निर्यातमा आएको उतारचढावका कारण भन्सार राजश्व पनि प्रभावित भएकाले लक्ष्यअनुसार राजश्व संकलन नभएको भन्सार प्रमुख शिवकुमार भण्डारीले जानकारी दिए ।
उनले विगतमा सो अवधिमा राजश्व संकलन गर्ने लक्ष्यको चालु आ.वमा लक्ष्य घटाए पनि प्रगति हासिल गर्न नसक्नुको प्रमुख कारण कोरोनाको महामारीले व्यपार व्यवसायमा आएको प्रभाव नै भएको बताए ।
कार्यालयले चालु आ.वको साउनमा दुई अर्ब २४ करोड ५६ लाख १४ हजार, भदौमा दुई अर्ब ५६ करोड ९६ लाख ९८ हजार, असोजमा तीन अर्ब ३४ करोड चार लाख ४१ हजार, कात्तिकमा तीन अर्ब चार करोड ४२ हजार, मङ्सिरमा तीन अर्ब १३ करोड ४० लाख ४२ हजार र पुसमा तीन अर्ब ७० करोड २७ लाख ४२ हजार राजश्व संकलन गरेको छ ।
कार्यालयले साउनमा १०२ दशमलव ७५ प्रतिशत प्रगति हासिल गरे पनि त्यसपछिका महिनामा क्रमशः ७९ दशमलव ५२, ७२ दशमलव ७०, ८३ दशमलव नौ, ६५ दशमलव ८३ र पुसमा ७९ दशमलव ८६ प्रतिशत प्रगति गरेको जनाएको छ ।
वि.सं.२०७७ माघ ९ शुक्रवार १०:३३ मा प्रकाशित
