काठमाडौं । रुरु जलविद्युत् परियोजनाले पहिलो चरणमा आयोजना प्रभावित स्थानीयको लागि आईपीओ निष्काशन गरेको छ । कम्पनीले गुल्मी जिल्लाको चन्द्रकोट गाउँपालिका ६ र ७ का स्थानीयलाई पहिलो चरणमा आवेदन खुला गरिएको हो ।
कम्पनीले ८ करोड १५ लाख ४१ हजार १०० रुपैयाँको आईपीओ निष्कासन गर्न लागेकोमा पहिलो चरणमा आयोजना प्रभावित स्थानीयलाई प्रति कित्ता एक सय रुपैयाँको दरले ४ करोड ७ लाख ७० हजार ५०० रुपैयाँको ४ लाख ७ हजार ७०५ कित्ता आईपीओ निष्कासन गरेको हो । आईपीओमा न्यूनतम १० देखि अधिकतममा ४ लाख कित्तासम्म आवेदन दिन पाइनेछ ।
यसको बिक्री प्रबन्धकमा एनएमबि क्यापिटल रहेको छ । कम्पनीको आईपीओमा सि–आस्बा सदस्यता प्राप्त गरेका बैंक तथा वित्तीय संस्थाहरु र तिनका शाखा कार्यालयहरुबाट आवेदन दिन सक्नेछन् । त्यस्तै शाइन रेसुंगा डेभलपमेन्ट बैंकका गुल्मी शाखा तम्घास तथा उक्त बैंकको खैरेनी, शान्तिपुर, मजुवा, वामिटक्सार र बलेटक्सार तथा गरिमा विकास बैंकको तम्घास, शान्तिपुर, मजुवा, गैंडाकोट र कुमारी बैंकको रिडी शाखाबाट आवेदन दिन सकिनेछ ।
उक्त आईपीओमा फागुन २१ गतेसम्म आवेदन दिन सकिने छ । उक्त अवधिमा माग अनुसार आवेदन नपरेको खण्डमा चैत ८ गतेसम्म आवेदन दिन सकिने छ । पहिलो चरणको सेयर बिक्री पछि दोस्रो चरणमा सर्वसाधारणका अंकित दरमा २० रुपैयाँ प्रिमियम थपेर १२० का दरले ४ लाख ७ हजार ७०६ कित्ता आईपीओ निष्काशन गर्ने छ ।
वि.सं.२०७७ फागुन ७ शुक्रवार १०:३३ मा प्रकाशित
