काठमाडौं । कोरोनाले निम्त्याएको लकडाउन हटेसँग उपत्यकामा हुण्डीको कारोबार सुरु भएको छ । महानगरीय प्रहरी वृत्त जनसेवाले हुण्डीको कारोबारमा संलग्न २ जनालाई साढे ४२ लाख सहित पक्राउ गरेको छ ।
काठमाडौं महानगरपालिका-२४ बिशालबजार नजिकबाट श्रोत नखुलेको नगद ३० लाख ५० हजार र बाँकी विभिन्न सहकारी संस्था तथा बैंकको चेक सहित साढे ४२ लाख रुपैयाँ प्रहरीले नियन्त्रणमा लिएको छ ।
जनसेवाबाट खटिएको प्रहरीले उक्त रुपैयाँसहित काठमाडौंका कालोपुल बस्ने गुल्मी कालिगण्डकी गाउँपालिका-१ का २५ बर्षीय गणेश पाण्डे लगायत २ जनालाई पक्राउ गरेको हो ।
उक्त स्थानमा हुण्डीको कारोबार भइरहेको भन्ने खबर प्राप्त हुनासाथ जनसेवाबाट खटिएको प्रहरीले उनीहरुलाई उक्त रकम सहित पक्राउ गरेको जनाएको छ ।
उनीहरुको साथबाट दरौदी बहुउद्देश्य सहकारी संस्थाको १ लाखको चेक, रञ्जना बहुउदेश्य सहकारी संस्थाको २५ हजारको चेक, कुमारी बैंकको २ लाख ८५ हजारको चेक, गुणकारी बचत तथा ऋण सहकारी संस्थाको १० हजारको चेक र १ थान मोबाइल लगायत प्रहरीले बरामद गरेको बताइएको छ । यस सम्बन्धमा प्रहरीले थप अनुसन्धान गरिरहेको जनाएको छ ।
वि.सं.२०७७ चैत १५ आइतवार ११:३९ मा प्रकाशित