गोरखा । गोरखाको धार्चे गाउँपालिकाले नयाँ वर्ष २०७८ को अवसरमा कर्मचारीहरुलाई थप तीन दिन भ्रमण बिदा दिने निर्णय भएको छ ।
आन्तरिक पर्यटन प्रवर्द्धन गर्ने उद्देश्यले गाउँपालिकाले आफ्ना कर्मचारीहरूलाई नयाँ वर्षमा थप तीन दिन दिने भएको गाउपालिकाका प्रमुख प्रशासकीय अधिकृत राम बहादुर अधिकारीले अर्थतन्त्रलाई जानकारी दिनुभयो । उहाँका अनुसार बैशाख २, ३ र ४ गते बिदा दिएको हो । यद्यपि बैशाख ४ गते भने शनिवार रहेको छ ।
आन्तरिक पर्यटन प्रवर्द्धनका लागि नयाँ वर्षमा कर्मचारीहरुलाई गाउँपालिकाका विभिन्न क्षेत्रमा भ्रमण गर्नका लागि बिदा दिएको गाउपालिकाले जनाएको छ ।
कर्मचारीहरूलाई गाउँपालिकाको बारेमा बुझ्न पनि सजिलो हुने र सरुवा भएर अन्यत्र गएपछि गाउँपालिकाको पर्यटकीय क्षेत्रको पनि प्रचारप्रसार हुने गाउँपालिकाले विश्वास लिएको छ ।
वि.सं.२०७७ चैत २९ आइतवार १३:५५ मा प्रकाशित