काठमाडौं। नेपाल धितोपत्र बोर्डले वस्तु विनिमयद बजार (कमोडेटी एक्सचेन्ज मार्केट) सञ्चालन गर्न अनुमति प्रदान गर्ने नीतिगत एवं प्रक्रियागत व्यवस्था सम्बन्धी निर्देशिकाको मस्यौदा तयार गरेको छ ।
बोर्डले शुक्रबार उक्त मस्यौदा सार्वजनिक गर्दै सरोकारवालाबाट सुझाव पनि माग गरेको छ । सरोकारवालाबाट सुझाव प्राप्त भएपछि मस्यौदालाई अन्तिम रुप दिएर निर्देशिका कार्यान्वयन गरिने बोर्डको भनाइ छ । त्यसपछि बोर्डमा आवेदन दिएका प्रस्तावित कम्पनीहरुलाई सञ्चालनको अनुमति दिन सकिने छ ।
निर्देशिकाको मस्यौदा मार्फत त्यस्ता कम्पनीको न्यूनतम चुक्तापुँजी १ अर्बदेखि २ अर्ब रुपैयाँसम्मको हुनुपर्ने बताएको छ । चुक्तापुँजीअनुसार कम्पनीहरुले तोकिएको वस्तु मात्र खरिद बिक्री गर्न पाउने छन् ।
यस्तै, त्यस्ता कम्पनीमा विदेशी रणनीतिक साझेदार वा प्राविधिक सहयोग गर्ने संस्थाका लागि कुल चुक्तापुँजीको कम्तीमा ५ देखि बढीमा ५१ प्रतिशतसम्म अनिवार्य रुपमा सेयर लगानी हुने गरि प्रस्ताव पेश गर्नुपर्ने छ ।
साथै, बस्तु विनिमय सञ्चालनका लागि प्रस्तावकले न्यूनतम ५१ प्रतिशत र बढीमा शत प्रतिशत सेयर लगानी गर्ने गरि प्रस्ताव पेश गर्नुपर्ने छ । यस्तै, बोर्डबाट अनुमति पाउने कम्पनीले २५ लाख रुपैयाँ शुल्क तोक्नुपर्ने बताइएको छ ।
मस्यौदा हेर्नका लागि यहाँ क्लिक गर्नुहोस्
वि.सं.२०७८ वैशाख १७ शुक्रवार १८:२४ मा प्रकाशित