काठमाडौं । चालु आर्थिक वर्षको १० महिना अवधिमा २२ करोड बढीको पानी तताउने विद्युतीय कित्ली तथा जग आयात भएको छ । भन्सार विभागको बैशाख मसान्तसम्मको तथ्याङ्कले यस्तो देखाएको हो ।
१० महिनाको अवधिमा २२ करोड २८ लाख ८६ हजार रुपैयाँ बराबरको पानी तताउने विद्युतीय कित्ली तथा जग आयात भएको छ । उक्त अवधिमा ४ लाख ८३ हजार ३०३ थान कित्ली तथा जग आयत भएको हो ।
कोरोना महामारी फैलिएसंगै । विगतको तुलनामा तातो पानी पिउने चलन बढ्दै गएपछि पानी तताउने कित्ली तथा जगको आयात बढेको विभागले जनाएको छ ।
नेपालमा विश्वका १० मुलुकहरुबाट कित्ली आयात हुने गरेको छ । छिमेकी मुलुक चीन, भारत, पोल्याण्ड, साउदी अरेविया, बेलायत, इजरायल लगायतका देशरुबाट आयात भएको विभागले जनाएको छ ।
बैशाख मसान्तसम्म सबैभन्दा बढी चीनबाट आयात भएको देखिएको छ । उक्त देशबाट १० महिनाको अवधिमा २१ करोड ९९ लाख ३ हजार रुपैयाँ बराबरको ४ लाख ८१ हजार ५७७ थान विद्युतीय पानी तताउने कित्ली तथा जग आयात भएको हो ।
बैशाख मसान्तसम्म भारतबाट १२ लाख ७ हजार रुपैयाँ बराबरको १ हजार ५२५ थान, पोल्याण्डबाट २ लाख ६३ हजार रुपैयाँको १३६ थान, बेलायतबाट १४ लाख ७० हजार रुपैयाँ बराबरको २२ थान आयात भएको छ ।
यस्तै, साउदी अरेबियाबाट ८ हजार रुपैयाँ बराबरको १६ थान, कतारबाट ६ हजारको १८ थान, इजरायलबाट ४ हजार रुपैयाँ बराबरको ७ थान, कोरियाबाट २३ हजार रुपैयाँ बराबरको कित्ली तथा जग आयात भएको विभागले जनाएको छ ।
वि.सं.२०७८ जेठ १६ आइतवार ११:२८ मा प्रकाशित
