काठमाडौं । साल्ट ट्रेडिङ्ग कर्पोरेशनले विभिन्न खाद्यवस्तुको मूल्यमा २० प्रतिशत छुट दिने भएको छ । सरकारले घोषणा गरेको आर्थिक वर्ष २०७८८९ को बजेट बक्तव्य अनुसार खाद्यबस्तुमा छुट दिने भएको हो ।
एक विज्ञप्ति जारी गर्दै कम्पनीले पिठो, चिनी, नुन, भटमासको तेल र खाना पकाउने ग्यासमा २० प्रतिशत छुट दिने भएको जनाएको छ ।
जसअनुसार पिठो २ केजीको ४४ रुपैयाँ, चिनी २ केजी ६३ रुपैया २० पैसा (प्रतिकेजी), भटमासको तेल प्रतिलिटर १८८ र खाना पकाउने ग्यास प्रतिसिलिण्डर १ हजार १२० रुपैयाँमा उपलब्ध गराउने भएको हो ।
खाना पकाउने ग्यास काठमाडौं उपत्यकामा मात्र उपलब्ध रहेको र खाली सिलिण्डर एसटीसी ब्राण्डको नै सोधभर्ना गर्नुपर्ने बताइएको छ । छुट निषेधाज्ञा अवधिभार निषेधाज्ञा जारी भएको स्थानहरुमा लागू हुने सूचनामा उल्लेख छ ।
पाँच जनासम्मको परिवारलाई एक महिनामा यी समान उपलब्ध हुने कम्पनीले जनाएको छ । उक्त प्रयोजनका लागि नागरिकता प्रमाण पत्रको प्रतिलिपिमा परिवारको सदसयहरुको नाम र संख्या उल्लेख गरि १ प्रति बझाउनुपर्ने बताइएको छ ।
वि.सं.२०७८ जेठ २० बिहीवार १८:२४ मा प्रकाशित
