काठमाडौं । एक वर्षको अवधिमा नेपालमा करिब ८ अर्ब बढीको लसुन तथा प्याज आयात भएको छ ।
भन्सार विभागमा अनुसार गत आर्थिक वर्ष २०७७÷७८ मा करिब ८ अर्ब बढीको लसुन, प्याज आयात भएको हो । एक वर्षको अवधिमा ७ अर्ब ७६ करोड ६५ लाख ७७ हजार रुपैयाँ बराबरको लसुन, प्याज आयात भएको हो ।
भन्सार विभागको तथ्याङ्क अनुसार नेपालमा लसुन मात्रै ५ अर्ब २९ करोड ८३ लाख ४१ हजार रुपैयाँ बराबरको आयात भएको छ । नेपालमा छिमेकी दुई मुलक चीन र भारतबाट लसुन आयात हुने गरेको छ ।
गत आवमा ५० हजार ३०३ टन भन्दा बढी लसुन आयात भएको छ । जसमा चीन तर्फको हिस्सा बढी रहेको छ । चीनबाट देशबाट ५ अर्ब २४ करोड ६४ लाख ७० हजार रुपैयाँ बराबरको लसुन नेपाल भित्रिएको हो । चीनबाट लसुन आयात गर्दा सरकारले १ अर्ब ३१ करोड ७२ लाख ५९ हजार रुपैयाँ राजस्व प्राप्त गरेको छ ।
गत वर्ष भारतबाट ५ करोड १८ लाख ७१ हजार रुपैयाँ बराबरको लसुन आयत भएको छ । उक्त अवधिमा भारतबाट ६१८ टन लसुन नेपाल आयात भएको विभागले जनाएको छ ।
विभागका अनुसार गत आर्थिक वर्षमा २ अर्ब ४६ करोड ८२ लाख ३६ हजार रुपैयाँ बराबरको प्याज आयात भएको छ । नेपालमा चीन, भारत, इजिप्ट, टर्की र इन्डोनेशियाबाट प्याज आउने गरेको छ ।
एक वर्षका अवधिमा ६९ हजार १७५ टन बढी प्याज नेपाल भित्रिएको विभागले जनाएको छ । नेपालमा सबैभन्दा बढी प्याज भारतबाट आउने गरेको छ । उक्त देशबाट गत आवमा २ अर्ब ३९ करोड ७८ लाख २३ हजार रुपैयाँ बराबरको ६१ हजार ६५४ टन बढी प्याज आयात भएको हो ।
गत वर्ष चीनबाट ५ करोड १२ लाख ९१ हजार रुपैयाँ बराबरको प्याज आयात भएको छ । उक्त मुलुकबाट ७७९ टनभन्दा बढी प्याज आएको विभागले जनाएको छ ।
यस्तै, इजिप्टबाट १ करोड ४६ लाख ८९ हजार, टर्कीबाट ४४ लाख २५ हजार र इन्डोनेशियाबाट ८ हजार रुपैयाँ बराबरको प्याज आयात भएको विभागले जनाएको छ । प्याज आयतबाट सरकारले २२ करोड ३२ लाख ८४ हजार रुपैयाँ राजस्व प्राप्त गरेको छ ।
वि.सं.२०७८ साउन २२ शुक्रवार १८:१० मा प्रकाशित
