काठमाडौं । चालु आर्थिक वर्ष २०७८/८९ को पहिलो महिनामै साढे ३५ करोड बढीको विद्युतीय सवारी साधान आयात भएको छ ।
भन्सार विभागले सार्वजनिक गरेको चालु आवको साउन महिनाको तथ्याङ्क अनुसार एक महिनामै ३५ करोड ७६ लाख ६३ हजार रुपैयाँ बराबरको विद्युतीय सवारी साधन आयात भएको हो ।
नेपालमा छिमेकी दुई मुलुक चीन, भारत, अमेरिका र कोरियाबाट विद्युतीय सावरी साधान आयात हुने गरेको छ । जसमध्ये विभिन्न तौल क्षमताका विद्युतीय कार, जीप र भ्यान आयात भएको विभागले जनाएको छ ।
साउन महिनामा ३३३ वटा विद्युतीय कार, जीप, भ्यान र तीन पाङ्ग्रे सवारी साधन आयात भएको विभागले जनाएको छ । यीमध्ये २२८ वटा तीन पाङ्ग्रे र १०५ वटा कार, जीप तथा भ्यान रहेका छन् ।
यीमध्ये ३३ करोड ५० लाख ४० हजार रुपैयाँ बराबरको विद्युतीय कार, जीप र भ्यान आयात भएको छ भने २ करोड २६ लाख २३ हजार रुपैयाँ बराबरको विद्युतीय तीन पाङ्ग्रे सवारी आयात भएको छ ।
चालु आवको पहिलो महिनामा १०० किलोवाट क्षमतासम्मका कार, जीप र भ्यान ४४ वटा, १५० किलोवाटदेखि २०० किलोवाट क्षमताससम्म ६१ वटा सवारी आयात भएको विभागले जनाएको छ ।
नेपालमा सबैभन्दा बढी कोरियाबाट १६ करोड ३४ लाख ३७ हजार रुपैयाँ बराबरको विद्युतीय सवारी आयात भएको छ । यस्तै, चीनबाट १५ करोड ८० लाख ८ हजार रुपैयाँ बराबरको ५६ वटा, भारतबाट १ करोड २४ लाख ८३ हजार रुपैयाँ बराबरको कार, जीप, भ्यान आयात भएको छ । यसप्रकारका सवारी आयातबाट नेपाल सरकारले ९ करोड २० लाख ३९ हजार रुपैयाँ राजस्व संकलन गरेको छ ।
२२८ वटा तीन पाङ्ग्रे विद्युतीय सवारी आयात
चालु आवको पहिलो महिनामा २ करोड ३७ लाख ३४ हजार रुपैयाँ बराबरको तीन पाङ्ग्रे विद्युतीय सवारी आयात भएको छ । साउन महिनामा २२८ वटा सवारी आयात भएको हो ।
यीमध्ये ४९ लाख ७८ हजार रुपैयाँ बराबरको ४० वटा तीन पाङ्ग्रे विद्युतीय सवारी भने जडान नभएको विभागले जनाएको छ ।
यसप्रकारका सवारी चीनबाट बढी आयात हुने गरेको छ ।
चालु आवको साउन महिनामा चीनबाट २ करोड २६ लाख २३ हजार रुपैयाँ बराबरको २१६ वटा तीन पाङ्गे विद्युतीय सवारी आयात भएको छ ।
यता, भारतबाट भने ११ लाख ११ हजार रुपैयाँ बराबरको १२ थान आएको छ । तीन पाङ्ग्रे सवारी आयातबाट ५७ लाख ६२ हजार रुपैयाँ राजस्व प्राप्त भएको छ ।
वि.सं.२०७८ भदौ १७ बिहीवार १७:१६ मा प्रकाशित