काठमाडौं । बेमौसमी बर्षातको कारण धानबाली, तरकारीबाली, माछा लगायतमा निकै क्षति परेपनि प्रदेश–२ को सरकारले सामान्य रुपमा लिएको छ ।
बेमौसमी बर्षातका कारण बालीमा असर परेको बेला प्रदेश २ को भूमि व्यवस्था, कृषि तथा सहकारी मन्त्रालयले विज्ञप्ति जारी गर्दै किसानको समस्या समाधान गर्न भन्दा पनि मातहतका निकायहरुमा पत्राचार गरी क्षतिको यकिन गर्ने गराउने काम सुरु गरेको जानकारी गराएको छ ।
मन्त्रालयका अनुसार क्षतिको यथार्थ विवरण यकित गर्न स्थानिय तहको ठूलो भूमिका रहेको र उक्त कार्यमा प्रदेश सरकारलाई सहकार्य तथा सहयोग गर्न अनुरोध गरेको छ ।
मन्त्रालयद्वारा जारी विज्ञप्तिमा कात्तिक १ र २ गते मौसममा भएको बदलाबको कारण अविरल बर्षा तथा हावाको प्रभावबाट कृषि बालीनालीमा परेको नकारात्मक प्रभावले मन्त्रालयको ध्यानाकर्षण भएको जनाएको छ ।
प्रदेश २ मा यो वर्ष करिब ४ लाख ३ हजार हेक्टरमा धान रोपाइ भएको र धानबाली भित्र्याउने बेलामा आएको अविरल बर्षाले किसानको महेनत तथा लगानी खेर जाने हो की भन्ने डर लाग्नु स्वभाविक भएको तर्क गरेको छ ।
मन्त्रालयका अनुसार हालसम्म प्राप्त सूचना अनुसार फाटफुट्ट रुपमा कटानी भएको पाजा (पसही) खेतमा नै डुबेको, हावाको बेगको कारण लामो उचाई भएका जातहरु ढलेकोबारे सूचनाहरु संकलनको क्रममा रहेको जनाएको छ ।
खेतमा फलेको तरकारीमा नोक्सानको साथै दलहन र तेलहन बाली लगाउन बाधा पर्न सक्नेभन्दै अहिले विभिन्न तरकारीका बेर्नाहरु नर्सरीमा हुर्काउने समय भएकोले उक्त बेर्नाका ब्याडहरुमा पानी जमेको जानकारीमा आएको मन्त्रालयको दाबी छ । माछाका पोखरीका डिलहरुमा फाटफुट क्षति पुगेको भएपनि पशुपन्छीमा क्षति नपुगेको मन्त्रालयको दाबी छ ।
वि.सं.२०७८ कात्तिक ४ बिहीवार १३:३७ मा प्रकाशित