काठमाडौं । साधना लघुवित्त वित्तीय संस्था चालु आर्थिक वर्ष २०७८/७९ त्रैमासमा ३ करोड बढी नाफा आर्जन गरेको छ ।
कम्पनीले सार्वजनिक गरेको आव २०७८/७९ को पहिलो त्रैमासिक वित्तीय विवरणले यस्तो देखाएको हो ।
असोज मसान्तसम्म कम्पनीले ३ करोड २९ लाख ८ हजार रुपैयाँ नाफा कमाएको छ । जुन गत आर्थिक वर्षको सोही अवधिमो तुलनामा ८८.३३ प्रतिशतले बढी हो । गत आवमा कम्पनीले १ करोड ७४ लाख ६८ हजार रुपैयाँ नाफा कमाएको थियो ।
उक्त अवधिमा कम्पनीको खुद ब्याज आम्दानी ७ करोड २१ लाख ९८ हजार रुपैयाँ रहेको छ । गत आवको सोही अवधिको तुलनामा कम्पनीको खुद ब्याज आम्दानी १३० प्रतिशतले वृद्धि भएको हो ।
कम्पनीको चुक्ता पुँजी २५ करोड ६९ लाख ८० हजार रुपैयाँ रहेको छ । कम्पनीले जगेडा तथा कोषमा १६ करोड २१ लाख ६० हजार रुपैयाँ राखेको छ ।
असोज मसान्तसम्म कम्पनीको खराब कर्जा १.६० प्रतिशत रहेको छ । गत आवको सोही अवधिको तुलनामा कम्पनीको खराब कर्जा पनि वृद्धि भएको हो । गत आवको सोही अवधिमा ०.७० प्रतिशत रहेको थियो ।
कम्पनीको प्रतिसेयर आम्दानी ५१.२२ रुपैयाँ, प्रतिसेयर नेटवर्थ १६३.१० रुपैयाँ रहेको छ ।
वि.सं.२०७८ कात्तिक १० बुधवार ११:५० मा प्रकाशित
