काठमाडौं । नेपाल राष्ट्र बैंकले कुमारी बैंकबाट गायक योगेश्वर अमात्यको नामको जग्गा नक्कली कागजात बनाएर अरुले नै ऋण लिएको घटनाको विस्तृत अनुसन्धान गरी रिपोर्ट बुझाएको छ ।
केन्द्रिय बैंकको अनुगमन टोलीले अध्ययन गरी बैंक तथा सुपरिवेक्षण विभिागका कार्यकारी निर्देशक डा.गुणाकर भट्टलाई प्रतिवेदन बुझाएको हो । ऋण प्रबाह हुदा क–कसको गल्ति भयो ? बैकिङ प्रणालीमा कुन च्यानलमा गएपछि खोट देखियो ? कर्मचारीहरुको नियममा नै खोट हो वा बैंकको जोखिम नियन्त्रण प्रणाली कमजोर हो ? भन्ने यकिन हुनका लागि केन्द्रिय बैंकले अनुसन्धान गरेको हो ।
रिपोर्टमा कुमारी बैंकबाट सिद्धार्थ बैंकमा रकम सारिएको र त्यहाँबाट नै ऋण रकमको कारोबार भएको पाइएको छ भने बैंकका कर्मचारीहरुको नियतका कारण नभएर प्रणालीगत समस्याका कारण यस्तो हुन पुगेको उल्लेख गरिएको छ ।
गायक अमात्यले बारामा २५ बिघा जग्गा किनेका थिए। त्यसमध्ये १३ विघा बिक्री भइसकेको र बाँकी १२ विघा अमात्यको नाममै थियो । सोही जग्गाको नक्कली कागजात बनाएर कुमारी बैंकबाट दुई जनाले १९ करोड रुपैयाँ ऋण लिएका थिए ।
रकमको कारोबार भएको सिद्धार्थ बैंकमाथि पनि केन्द्रिय बैंकले छु्ट्टै अनुसन्धान गरेको थियो । सो टोलीले पनि प्रतिवेदन बुझाइसकेको छ । दुवैको प्रतिवेदनको अध्ययन गरेपछि कुमारी बैंकमाथि कुनै कारबाही प्रकृया अगाडी बढाउन सक्ने राष्ट्र बैंकका एक अधिकारीले जानकारी दिए ।
वि.सं.२०७८ मंसिर २० सोमवार १२:४३ मा प्रकाशित