काठमाडौ । मंसिर महिनाको २४ दिनमा बाणिज्य बैंकहरुले निक्षेप १२ अर्ब रुपैयाँले गुमाएका छन् । तर सोही अवधिमा कर्जा प्रबाह भने ४२ अर्ब रुपैयाँले बृद्धि गरेका छन् ।
नेपाल बैंकर्स संघको तथ्यांक अनुसार मंसिर महिनाको पहिलो साता बाणिज्य बैंकहरुले आफुसँग भएको निक्षेप ८ अर्ब रुपैयाँले गुमाएका थिए भने ७ अर्ब रुपैयाँले कर्जा प्रबाहमा बृद्धि गरेका थिए ।
त्यस्तै मंसिरको दोस्रो साता पनि निक्षेप ६ अर्बले गुमाएका थिए भने १४ अर्ब रुपैयाँले कर्जामा बृद्धि गरेका छन् । संघको तथ्यांक अनुसार मंसिरको तेस्रो साता भने
बाणिज्य बैंकहरुले ७ अर्ब रुपैयाँ निक्षेप संकलन गर्न सफल भएका थिए भने १४ अर्ब रुपैयाँ कर्जा प्रबाह गरेका थिए । तर निक्षेप संकलनलाई गत साता निरन्तरता दिन नसकी बैंकहरुले पुन ५ अर्ब रुपैयाँले निक्षेप गुमाएका छन् भने ७ अर्ब रुपैयाले कर्जामा बृद्धि गरेका छन् ।
बाणिज्य बैंकहरुसँग मंसिर २४ गतेसम्ममा निक्षेप ४२ खर्ब २१ अर्ब रुपैयाँ निक्षेप रहेको छ भने ४० खर्ब ७७ अर्ब रुपैयाँ कर्जा प्रबाह भएको छ ।
वि.सं.२०७८ मंसिर २७ सोमवार १७:२८ मा प्रकाशित
