काठमाडौं । चालु आथिक वर्ष २०७८/७९ को पाँच महिनाको अवधिमा करिब साढे ६ अर्ब रुपैयाँको ल्यापटप तथा नोटबुक आयात भएको हो ।
भन्सार विभागले हालै सार्वजनिक गरेको मंसिर मसान्तसम्मको तथ्याङ्क अनुसार उक्त अवधिमा ६ अर्ब ४७ करोड ३५ लाख ५३ हजार रुपैयाँ बराबरको ल्यापटप तथा नोटबुक आयात भएको हो ।
उक्त अवधिमा नेपालमा विश्वका करिव तीन दर्जन मुलुकहरुबाट १ लाख ११ हजार ६६ थान ल्यापटप तथा नोटबुक भित्रिएको छ । ल्पापटप तथा नोटबुक आयातबाट सरकारले ८४ करोड १० लाख ९४ हजार रुपैयाँ राजश्व प्राप्त गरेको छ ।
विश्वव्यापी रुपमा फैलिएको कोरोना महामारी तथा सरकारले जारी गरेको निषेधाज्ञाको कारण अधिकांश कार्यालय तथा शैक्षिक गतिविधि डिजिटल मार्फत संचालन हुने हुँदा पनि नेपालमा ल्यापटप तथा नोटबुकको माग निकै वृद्धि भएको छ ।
पछिल्लो समयमा जसको प्रभाव आयातमा परेको छ । कोरोनाका कारण नेपालमा ल्यापटपको माग मात्रै बढेको छैन, मूल्य पनि निकै बढेको छ ।
महामारीका कारण भौतिक उपस्थितिमा नै हुने अधिकांश शैक्षिक गतिविधि, सभा–सम्मेलन, गोष्ठी, तालिम लगायतका भिडभाडजन्य कार्यक्रमहरु भर्चुअल माध्यमबाट संचालन हुने गरेपछि ल्यापटपको माग उच्च वृद्धि भएको विभागले जनाएको छ ।
नेपालमा सबैभन्दा बढी चाईनीज ल्यापटप तथा नोट भित्रिएको विभागले जनाएको छ । विभागको तथ्याङ्क अनुसार मंसिर मसान्तसम्ममा चीनबाट मात्रै ६ अर्ब १२ करोड ९८ लाख ७२ रुपैयाँ बराबरको आयात भएको छ । उक्त देशबाट १ लाख ५ हजार ९७१ थान ल्यापटप तथा नोटबुक आयात भएको हो ।
यस्तै, बढी आयात हुनेको दोस्रो स्थानमा रहेको मलेशियाबाट २० करोड ५८ लाख ३ हजार रुपैयाँ बराबरको ल्यापटप तथा नोटबुक नेपाल भित्रिएको छ । उक्त देशबाट नेपालमा ३ हजार १०५ थान ल्पायटप तथा नोटबुक आयात भएको हो ।
यस्तै, चालु आवको पछिल्लो पाँच महिनाको अवधिमा सिंगापुरबाट ५ करोड ३१ हजार, अमेरिकाबाट ३ करोड ३ लाख ५२ हजार, जापानबाट १ करोड ९ लाख ६५ हजार रुपैयाँ बराबरको ल्यापट तथा नोट बुक आयात भएको छ ।
त्यसैगरि यूएईबाट ९० लाख १४ हजार, ताइवानबाट ६३ लाख ८४ हजार, थाइल्याण्डबाट ५२ लाख ७३ हजार, कोरियाबाट ४९ लाख १३ हजार, भारतबाट ३६ लाख ८ हजार, भेटनामबाट ३१ लाख ६६ हजार, फिलिपिन्सबाट २० लाख ४० हजार र अष्ट्रेलियाबाट १९ लाख २१ हजार रुपैयाँ बराबरको आयात भएको छ ।
यता, स्वील्याण्डबाट १३ लाख ७ हजार, बेलायतबाट ९ लाख ७ हजार, मेक्सिकोबाट ५ लाख ५५ हजार, कतारबाट ४ लाख १६ हजार, नेदरल्याण्डबाट ३ लाख ४६ हजार, डेनमार्कबाट २ लाख ७४ हजार, हङकङकबाट २ लाख ८ हजार इज्रायलबाट १ लाख १५ हजार, आयरल्याण्डबाट १ लाख १ हजार रुपैयाँ बराबरको ल्यापटप तथा नोटबुक आयात भएको छ ।
चालु आवको मसान्तसम्ममा स्वीट्जरल्याण्ड, स्वीडेन, स्पेन, साउदी अरेबीया, म्यानमार, कुवेत, जर्मनी, फ्रान्स, फिनल्याण्ड, बह्राइन लगायतको देशरुबाट ल्याटप तथा नोटबुक नेपाल भित्रिएका छन् ।
वि.सं.२०७८ पुस ११ आइतवार १७:४३ मा प्रकाशित