काठमाडौं । चालु आर्थिक वर्ष २०७८/७९ को पाँच महिनाको अवधिमा २७ करोड बढीको तीन पाङ्ग्रे इलेक्ट्रिक सवारी साधान आयात भएको छ ।
चालु आवको पाँच महिना अर्थात मंसिर मसान्तसम्म २७ करोड ७ लाख ५१ हजार रुपैयाँ बराबरको तीन पाङ्ग्रे इलेक्ट्रिक सवारी साधान आयात भएको हो ।
भन्सार विभागले हालै सार्वजनिक गरेको तथ्याङ्क अनुसार उक्त अवधिमा २ हजार ७६८ थान तीन पाङ्ग्रे इलेक्ट्रिक सवारी नेपाल भित्रिएको होे । उक्त प्रकारकार सवारी आयातबाट सरकारले ६ करोड ५६ लाख ९७ हजार रुपैयाँ राजश्व प्राप्त गरेको छ ।
नेपालमा छिमेकी दुई मुलुक भारत र चीनबाट तीन पाङ्ग्रे इलेक्ट्रिक सवारी साधान आयात हुने गरेको छ । चालु आवको पाँच महिनाको अवधिमा सबैभन्दा बढी चीनबाट आयात भएको छ ।
उक्त अवधमिा चीनबाट १५ करोड ९७ लाख ६५ हजार रुपैयाँ बराबरको १ हजार ६९२ थान तीन पाङ्ग्रे इलेक्ट्रिक सवारी साधान आयात भएको छ ।
जसमध्ये चीनबाट उक्त अवधिमा १२ करोड ३५ लाख ७२ हजार रुपैयाँ बराबरको जडान गरिएको र ३ करोड ६१ लाख ९३ हजार रुपैयाँ बराबरको जडान नगरिएको तीन पाङ्ग्रे सवारी साधान नेपाल भित्रिएको हो ।
चीनबाट तीन पाङ्ग्रे सवारी साधान आयातबाट सरकारले ३ करोड ८८ लाख २५ हजार रुपैयाँ राजश्व संकलन गरेको छ ।
यस्तै, चालु आवको मंसिर मसान्तसम्ममा भारतबाट ११ करोड ९ लाख ८६ हजार रुपैयाँ बराबरका तीन पाङ्ग्रे इेलिक्ट्रक सवारी साधान आयात भएको छ ।
उक्त अवधिमा भारतबाट १ हजार ७६ थान सवारी आयात भएको हो । जसमध्ये १ करोड १८ लाख ८१ हजार रुपैयाँ बराबरको १८० थान सवारी भने जडान नगरिएका हुन् ।
भारतबाट तीन पाङ्ग्रे इेलेक्ट्रिक सवारी आयातबाट नेपाल सरकारले २ करोडठ ६८ लाख ७२ हजार रुपैयाँ राजश्व प्राप्त गरेको छ ।
वि.सं.२०७८ पुस १२ सोमवार १३:४४ मा प्रकाशित