बैंक तथा वित्तीय संस्था परिसंघ नेपाल (सिबिफिन) का अध्यक्ष पवन गोल्यानले राष्ट्र बैंकद्धारा केही वस्तुमा लगाईएको सत प्रतिशत मार्जिनको व्यवस्था स्वागतयोग्य रहेको बताएका छन् । सिबिफिनले आज (शुक्रबार) आयोजना गरेको पत्रकार सम्मेलनमा बोल्दै अध्यक्ष गोल्यानले यस्तो बताएका हुन् ।
“केही दिन अगाडी राष्ट्र बैंकले १८ वस्तुको आयातमा सत प्रतिशत र मोटरसाइकल लगायतका दुई शिर्षकका वस्तुमा पचास प्रतिशत नगद मार्जिनको व्यवस्था गरेको छ, जुन स्वागतयोग्य छ । तर, १८।२० वस्तुमा मात्रै नभई औद्योगीक कच्चा पदार्थ, औद्योगीक मेसिनरी सामान बाहेकका हरेक किसीमका वस्तुको आयातमा यसरी नै क्यास मार्जिनलाई अनिवार्य राख्नुपर्दछ ।” उनले भने ।
मुलुकको आर्थिक अवस्था कोभिडबाट तहसनहस भएको समयमा देशले अहिलेको ट्रेनमा आयात धान्न नसक्ने उनले बताए । “अहिलेको आयातलाई कम गर्ने पर्छ, आयात प्रतिस्थापन कर कम्तीमा पनि १५ प्रतिशत लगानउनुपर्छ ।” उनले भने ।
अति आवश्यक र स्वदेशमा नै उपलब्ध गराउन नसकिने बाहेकका सबै प्रकारका वस्तु तथा सेवा आयातमा नै सत प्रतिशत नगद मार्जिनको व्यवस्था गरी आयातमा कडाई गर्नुपर्ने गोल्यानको भनाई छ । आयातमा कडाई मात्रै नभई स्वदेशको उत्पादनलाई समेत प्रोत्साहन गर्नुपर्नेमा उनले जोड दिएका छन् ।
कृषिजन्य आयातमा अझ थप कडाई गर्नुपर्ने र यहाँको उत्पादनलाई नै बढवा दिनुपर्ने गोल्यानले बताए । उनले भने “जबसम्म विदेशबाट आउने कृषिजन्य उत्पादनको आयातमा कडाई गरी नेपाली उत्पादनलाई स्थान दिईदैँन तबसम्म जतिसुकै विकास र समृद्धिको कुरा गरेपनि केही हुँदैन ।”
नेपालमा नै उत्पादन गर्न सकिने आलु अहिले पनि दिनमा ३० ट्रक आलु बबंगलादेशबाट आउने बताउँदै यो दुर्भाग्य पुर्ण कुरा रहेको बताए । यस्तो आयातलाई हामीले रोक्न जरुरी छ । आर्थिक क्षेत्रमा कुनैपनि क्राईसेस आउँदासाथ बैंकहरुले गाली खानुपर्ने अवस्था आउँछ, राष्ट्र बैंकले दबावपूर्ण रुपले स्प्रेड दर, ईपीएस लगायतका विषयमा सिमा तोकेर तत्काल लागु गर्न लगाईन्छ । तर यसको लागि महत्वका साथ अगाडी बढाउनुपर्ने र प्रोत्साहन गर्नुपर्ने क्षेत्रबाहेकका क्षेत्रमा ब्याजदर नै ४ प्रतिशत बढी गराउने हो भने यी र यस्ता समस्याहरु धेरै कम हुने अध्यक्ष गोल्यानले बताए ।
बैंक तथा वित्तीय संस्थाहरु सधै देशको विकाश होस भन्ने पक्षबाट लागिरहेको बताउँदै कुनै निश्चित समूह तथा व्यक्तिलाई नाफा हुने गरी नियामक निकायले नियम नबनाउन उनले आग्रह गरे ।
वि.सं.२०७८ पुस १६ शुक्रवार १९:२५ मा प्रकाशित
