काठमाडौं । बिहीबार एनएमबि बैंकसहित तीन कम्पनीको साधारण सभा हुँदैछ ।
आज एनएमबि बैंक, नेपाल पुनर्बीमा कम्पनी र हाइड्रोइलेक्ट्रीसी इन्भेष्टमेण्ट एण्ड डेभलपमेण्ट कम्पनी (एचआईडिसीएल) ले सभा गर्न लागेका हुन् ।
यी तीनै कम्पनीहरुको साधारण सभामा लाभांश पारित गर्ने मुख्य एजेण्डा रहेको छ ।
एनएमबि बैंक : बिहीबार एनएमबि बैंकको २६औं वार्षिक साधारण सभा हुँदैछ । सभामा लाभांश पारित गर्ने मुख्य एजेण्डा रहेको छ ।
बैंकले गत आर्थिक वर्ष २०७७/७८ को मुनाफाबाट सेयरधनीहरुलाई १५.८ प्रतिशत लाभांश दिने प्रस्ताव गरेको छ ।
जसमध्ये बैंकले सेयरधनीहरुलाई १२.५० प्रतिशत बोनस सेयर र कर प्रयोजनका लागि ३.३० प्रतिशत नगद लाभांश वितरण गर्ने प्रस्ताव गरेको हो ।
यस्तै, सभामा आर्थिक वर्ष २०७७/७८ को संचालक समितिको वार्षिक प्रतिवेदन पारित, र आव २०७८÷७९ को लागि लेखापरीक्षकको नियुक्ति र निजको पारिश्रमिक तोक्ने प्रस्ताव पारित हुने छ ।
सभा प्रयोजनका लागि बैंकले पुस ७ गते बुक क्लोज गरिसकेको छ ।
नेपाल पुनर्बीमा कम्पनी : नेपाल पुनर्बीमा कम्पनीले पनि बिहीबार छैठौं वार्षिक साधारण सभा गर्दैछ ।
सभाले आव २०७६/७७ को मुनाफाबाट १६.५० प्रतिशत बोनस सेयर र २.५० प्रतिशत नगद लाभांश कर समेत वितरण गर्ने प्रस्ताव पारित गर्नेछ ।
कम्पनीले साधारण सभा प्रयोजनको लागि पुस १४ गते बुक क्लोज गरेको छ । पुुस १३ गतेसम्म कायम सेयरधनीले सभामा भाग लिन र लाभांश पाउनेछन् ।
एचआईडिसीएल : एचआईडिसीएलले १०औं वार्षिक साधारण सभा पनि बिहीबार हुँदैछ । सभा कम्पनीको रजिष्टर्ड कार्यालय हात्तीसार काठमाडौंमा बिहान ९ बजे हुनेछ ।
सभामा लाभांश पारित गर्ने मुख्य एजेण्डा रहेको छ । कम्पनीले सेयरधनीहरुलाई ८ प्रतिशत बोनस सेयर र कर प्रयोजनका लागि ०.४२१ प्रतिशत नगद लाभांश वितरण गर्ने प्रस्ताव पारित गर्नेछ ।
कम्पनीले साधारण सभा प्रयोजनको लागि पुस ५ गते बुक क्लोज गरेको हो । यस आधारमा पुस ४ गतेसम्म कायम शेयरधनीले साधारण सभामा भाग लिन र लाभांश पाउनेछन् ।
वि.सं.२०७८ पुस २२ बिहीवार ११:०२ मा प्रकाशित
