काठमाडौं । आधा दर्जन कम्पनीहरुले साधारण सभाका लागि मिति तय गरेका छन् ।
हालसम्म माघ र आउँदो फागुन महिनामा ५ वटा बीमा कम्पनीसहित ७ कम्पनीहरुले सभाका लागि मिति तोकेका हुन् ।
आउँदो शुक्रबार अर्थात माघ २१ गते तीन कम्पनीको साधारण सभा हुँदैछ । उक्त दिन एशियन लाइफ इन्स्योरेन्स, प्रिमियर इन्स्योरेन्स र ग्रीन लाइफ हाइड्रोपावर कम्पनीले सभा गर्दैछन् ।
सभामा लाभांश पारित गर्ने मुख्य एजेण्डा रहेको छ । माघ २१ गते हुने एशियन लाइफको १३ औं वार्षिक साधारण सभाले २७ प्रतिशत लाभांश पारित गर्नेछ । कम्पनीको सभाले आर्थिक वर्ष २०७६७७ को मुनाफाबाट सेयरधनीहरुलाई २५ प्रतिशत बोनस सेयर र कर सहित २ प्रतिशत नगद लाभांश वितरण गर्ने प्रस्ताव पारित गर्नेछ । सभा प्रयोजनका लागि कम्पनीले माघ १२ गते बुक क्लोज गरेको छ ।
यस्तै, माघ २१ गते शुक्रबार नै हुने प्रिमियर इन्स्योरेन्सको साधारण सभाले पनि प्रस्तावित लाभांश पारित गर्ने मुख्य एजेण्डा रहेको छ । कम्पनीको साभाले १५ प्रतिशत लाभांश पारित गर्नेछ । कम्पनीले सेयरधनीहरुलाई १४.२५ प्रतिशत बोनस सेयर र कर प्रयोजनका लागि ०.७५ प्रतिशत नगद लाभांश दिने प्रस्ताव गरेको छ । सभा प्रयोजनका लागि कम्पनीले माघ ५ गतेदेखि २१ गतेसम्म बुक क्लोज गरेको छ ।
त्यसैगरि सोही दिन (माघ २१) गते ग्रीन लाइफ हाइड्रोपावर कम्पनीले सभा गर्ने भएको छ । कम्पनीले भने लगानीकर्तालाई लाभांश नदिने भएको छ । कम्पनीको सभाले सञ्चालक समितिको प्रतिवेदन उपर छलफल गरी पारित गर्ने, लेखापरीक्षकको प्रतिवेदनसहित आर्थिक वर्ष २०७७÷०७८ को वित्तिय विवरणहरु उपर छलफल गरी पारित गर्ने, कम्पनी ऐन, २०६३ को दफा १११ अनुसार आर्थिक वर्ष २०७८/७९ को लागी लेखापरीक्षण गर्न लेखापरीक्षकको नियुक्ति गर्ने र निजको पारिश्रमिक निर्धारण गर्ने लगायतका प्रस्ताव पारित गर्नेछ । सभा प्रयोजनका लागि कम्पनीले माघ ९ गते बुक क्लोज गरेको छ ।
यता, ज्योति लाइफ इन्स्योरेन्स र अजोड इन्स्योरेन्स कम्पनीले आउँदो फागुन ६ गते वार्षिक साधारण सभा गर्ने भएका छन् ।
उक्त दिन हुने ज्योति लाईफको वार्षिक साधारण सभामा लाभांश पारित गर्ने मुख्य एजेण्डा रहेको छ । कम्पनीले आव २०७६/७७ को मुनाफाबाट सेयरधनीहरुलाई १०.५२ प्रतिशत लाभांश दिने प्रस्ताव गरेको छ । जसमध्ये १० प्रतिशत बोनस सेयर र कर प्रयोजनका लागि ०.५२६३ प्रतिशत नगद लाभांश दिने भएको हो । सभा प्रयोजनका लागि कम्पनीले माघ २४ गते बुक क्लोज गर्ने भएको छ ।
सोही दिन (फागुन ६ गते) हुने अजोड इन्स्योरेन्सले भने लगानीकर्ता लाभांश वितरणको प्रस्ताव गरेको छैन । तर, कम्पनीको सभाले सञ्चालक समितिको तर्फबाट अध्यक्षद्वारा आर्थिक वर्ष २०७७/७८ को वार्षिक प्रतिवेदनबारे छलफल गरी पारित गर्ने, आव २०७७/७८ को लेखापरीक्षण प्रतिवेदन, वासलात, नाफा नोक्सान हिसाब र सोहि अवधिको नगद प्रवाह विवरण लगायतका वित्तिय विवरणहरू छलफल गरी पारित, तथा आव २०७८/७९ को लागि लेखापरीक्षक नियुक्ति गरी पारिश्रमिक पनि तोकिनेछ । साधारण सभा प्रयोजनार्थ कम्पनीले २४ माघमा बुक क्लोज गर्नेछ ।
आउँदो फागुन ७ गते जानकी फाइनान्स कम्पनीले २५औं वार्षिक साधारण सभा गर्ने भएको छ । कम्पनीको सभाले लाभांश पारित गर्ने मुख्य एजेण्डा रहेको छ । कम्पनीले आव २०७७/७८ को मुनाफाबाट सेयरधनीहरुलाई १५ प्रतिशत बोनस सेयर र कर प्रयोजनका लागि ०.८७९५ प्रतिशत नगद लाभांश दिने प्रस्ताव गरेको छ । सभा प्रयोजनका लागि कम्पनीले माघ २६ गतेदेखि ६ गतेसम्म बुक क्लोज गर्ने भएको छ ।
यता, लाइफ इन्स्योरेन्स कर्पोरशेन नेपालले भने आउँदो फागुन ११ गते वार्षिक साधारण सभा गर्ने भएको छ । सभाले आव २०७६/७७ को मुनाफाबाट सेयरधनीहरुलाई २१ प्रतिशत लाभांश वितरणको प्रस्ताव पारित गर्नेछ ।
कम्पनीले सेयरधनीहरुलाई २० प्रतिशत बोनस सेयर र कर प्रयोजनका लागि १ प्रतिशत नगद लाभांश दिने भएको हो । सभा प्रयोजनका लागि कम्पनीले माघ २४ गते बुक क्लोज गर्ने भएको छ ।
वि.सं.२०७८ माघ १९ बुधवार १७:११ मा प्रकाशित