काठमाडौं । यतिवेला विश्व युक्रेनको विषयलाई लिएर अशान्त बनीरहेको छ । रुसले बुधबारदेखि युक्रेनमा सैन्य कारबाही सुरु गरेपछि विश्वको ध्यान यतिवेला युक्रेनतर्फ सोझिएको छ ।
विस्तारै चर्कदै गएको रुस र युक्रेनविचको द्धन्द्धले छिट्टै समाधान हुनेवाला छैन । किनकी युक्रेन र रसियाको विचमा अमेरिका र युरोप पनि देखिएपछि अन्य शक्तिराष्ट्रहरु पनि विभाजन हुदै गइरहेका छन् । कोरोनाले थला पारेको विश्वको अर्थतन्त्रलाई यो युद्धले पुन समस्यामा पार्न सक्ने अर्थशास्त्रीहरुले बताइरहेका छन् ।
दुरीका हिसावले धेरै टाढा भएपनि नेपालसँग युक्रेनको व्यापार रहेको छ । युक्रेन अशान्त रहदा नेपालको अर्थतन्त्रमा पनि असर पर्नेछ । युक्रेनबाट नेपालले बार्षिक १७ अर्ब रुपैयाँ बराबरको आयात गरिरहेको छ । युक्रेनबाट नेपालमा ठूलो हिस्सामा खानेतेलको आयात हुने गरेको छ ।
युक्रेनमा भएको हमलाले नेपालमा खाने तेल आयातमा समस्या हुन सक्छ जसका कारण खानेतेलको अभाव भई मुल्यबृद्धि हुन सक्छ । भन्सार विभागको तथ्याङ्अनुसार नेपालमा युक्रेनबाट चालु आर्थिक वर्षको ७ महिनाको अवधिमा १४ अर्ब ४२ करोड ३३ लाख रुपैयाँको वस्तु आयात भएको छ ।
त्यस्तै नेपालबाट पनि युक्रेनमा निर्यात हुने गरेको छ । यो ७ महिनामा नेपालबाट युक्रेनमा १५ लाख बराबरको निर्यात भएको छ । ७ महिनाको अवधिमै युक्रेनसँग १४ अर्ब ८२ करोड १८ लाख रुपैयाँ व्यापारघाटा व्यहोरेको छ ।
युक्रेनबाट नेपालले सबैभन्दा बढी सनफ्लावरको दाना ९ अर्ब ५१ करोड ६३ लाख रुपैयाँ बराबरको आयात गरेको छ । त्यस्तै तोरी, भटमास लगायत पनि आयत गर्ने गरेको छ ।
वि.सं.२०७८ फागुन १२ बिहीवार १५:३६ मा प्रकाशित
