काठमाडौं । सहकारी विभागले सहकारी सन्दर्भ ब्याजदर १६ प्रतिशत तोकेको छ । शुक्रबार बसेको सन्दर्भ ब्याजदर निर्धारण समितिको बैठकले सहकारीमा १६ प्रतिशत ब्याजदर तोकेको हो ।
समितिका सदस्य तथा राष्ट्रिय सहकारी महासंघका वरिष्ठ उपाध्यक्ष ओमदेवी मल्लका अनुसार राष्टिय सहकारी महासंघले तरलता अभावका कारण १७ प्रतिशत व्याजदर बनाउन सुझाव दिएपनि व्याजदर निर्धारणका लागि तोकिएको प्राविधिक उपसमितिले दिएको सुझाव र अर्थमन्त्रालय, सहकारी मन्त्रालय लगायतका सहमतिमा १६ प्रतिशत तोकिएको हो ।
सन्दर्भ व्याजदर निर्धाणका लागि बनाइएको प्राविधिक उपसमितिले १६.२२ प्रतिशत बनाउनु उपयुक्त हुने प्रतिबेदन दिएको थियो । लामोसमयदेखि सन्दर्भ व्याजदर परिवर्तन हुन नसक्दा तरलता अभावका कारण सहकारीको रकम बैंकहरुमा गइरहेको गुनासो सहकारीहरुले गरेका थिए ।
सन्दर्भ व्याजदर तोक्नका लागि पटक पटक सन्दर्भ ब्याजदर निर्धारण समितिको बैठक बसेको भए पनि निस्कर्षमा पुग्न सकेको थिएन । यसअघि सहकारीमा सन्दर्भ व्याजदर १४.७५ प्रतिशत तोकिएको थियो ।
नयाँ तोकिएको व्याजदर आगामी आइतबारदेखि लागु हुने विभागले जनाएको छ। बैठकले अब चार/चार महिनामा नियमित रुपमा बैठक बसी सन्दर्भ ब्याजदरको विषयमा छलफल गर्ने निर्णय समेत गरेको छ ।
वि.सं.२०७८ फागुन १३ शुक्रवार १८:०७ मा प्रकाशित