काठमाडौँ । माघ महिनामा निर्जीवन बिमा कम्पनीहरुको बिमालेख(बिमा पोलिसि) बिक्रि संख्यामा गिरावट आएको छ ।
अघिल्लो महिनाको तुलनामा माघमा सरकारी स्वामित्वको राष्ट्रिय बीमा कम्पनी सहित तीन कम्पनी बाहेक सबै कम्पनीको पोलिसि बिक्रिमा गिरावट आएको हो ।
माघ महिनामा मात्रै हाल सञ्चालनमा रहेका निर्जीबन बीमा कम्पनीहरुले कुल २ लाख २० हजार २ सय ७२ पोलिसि बिक्रि गरेका छन् । जबकी पुस महिनामा यी कम्पनीहरुले कुल २ लाख ६१ हजार ६ सय ८७ पोलिसि बिक्रि गरेका थिए । हाल नेपालमा २० वटा निर्जिबन बीमा कम्पनीहरु सञ्चालनमा रहेका छन् । यो तथ्यांक सोही कम्पनीहरुको हो ।
यो पछिल्लो एक महिनाको अवधिमा सरकारी कम्पनी संस्थानले भने बिक्रि पोलिसी ३८ प्रतिशतले बढाएको छ । पुसमा भन्दा माघमा संस्थानले २ हजार ३ सय ४६ संख्याले बढी पोलिसी बिक्रि गरेको हो । अर्थात पुस महिनामा ६ हजार १६ पोलिसि बिक्रि गरेकोमा माघमा ८ हजार ३ सय ६२ पोलिसि बिक्रि गरेको छ । त्यस्तै माघमा पोलिसि संख्या बिक्रि दर बढाउनेमा प्रभु इन्स्योरेन्स र शिखर इन्स्योरेन्स रहेका छन् ।
यता निजी लगानीको नेपाल इन्स्योरेन्स कम्पनी लिमिटेडको भने पोलिसि बिक्रिमा सबैभन्दा सुस्तता देखिएको छ । कम्पनीको पोलिसि बिक्रि दर अघिल्लो महिनाको तुलनामा ३२ प्रतिशतले घटेको हो । अर्थात पुसमा १६ हजार ४२ पोलिसि बिक्रि गरेकोमा माघमा मात्रै १० हजार ७ सय ५४ पोलिसि बिक्रि गरेको हो ।
वि.सं.२०७८ फागुन १९ बिहीवार १८:१९ मा प्रकाशित
