काठमाडौं । एफपीओ निष्काशनको तयारीमा रहेको समता घरेलु लघुवित्त वित्तीय संस्थाले चालु आर्थिक वर्ष २०७८/७९ को ३ करोड ५५ लाख २७ हजार रुपैयाँ नाफा कमाएको छ ।
कम्पनीको यो नाफा गत वर्षको पुुस मसान्तसम्मको तुलनामा भने २.४३ प्रतिशतले कमी हो । गत वर्षको सोही अवधिमा कम्पनीले ३ करोड ६४ लाख १३ हजार रुपैयाँ नाफा गरेको थियो ।
चालु आवको ६ महिनाको अवधिमा कम्पनीको खुद ब्याज आम्दानी ८७.९७ प्रतिशतले वृद्धि भई ११ करोड ७१ लाख ४४ हजार रुपैयाँ पुगेको छ । गत वर्षको सोही अवधिमा भने कम्पनीको यो आम्दानी ६ करोड २३ लाख २१ हजार रुपैयाँ रहेको थियो ।
उक्त अवधिमा कम्पनीको संचालन मुनाफामा भने उल्लेखीय सुधार देखिएको छ । कम्पनीको संचालन मुनाफा ४७३.४५ प्रतिशतले वृद्धि भई १ करोड ९७ लाख ४४ हजार रुपैयाँ पुगेको छ । गत वर्षको पुस मसान्तसम्ममा कम्पनीको यो मुनाफा ३४ लाख ४३ हजार रुपैयाँ रहेको थियो ।
कम्पनीको चुक्ता पुँजी ३४ करोड २७ लाख ४४ हजार रुपैयाँ रहेको छ । कम्पनीले जगेडा तथा कोषमा भने १४ करोड ४८ लाख ३१ हजार रुपैयाँ राखेको छ ।
उक्त अवधिमा कम्पनीको खराब कर्जा पनि १.३३ प्रतिशतले घटेर २.०९ प्रतिशतमा झारेको छ ।
कम्पनीको प्रतिसेयर आम्दानी ११ रुपैयाँ २ पैसाले घटेर २० रुपैयाँ ७३ पैसा कायम भएको छ । कम्पनीको प्रतिसेयर नेटवर्थ १४२ रुपैयाँ २६ पैसा रहेको छ ।
कम्पनीले १०० अंकित दर २ करोड ८९ लाख ४४ हजार रुपैयाँबराबरको कुल २ लाख ८९ हजार ४४० कित्ता एफपीओ जारी गर्ने भएको छ ।
साविक समता लघुवित्त र घरेलु लघुवित्तबीच १००ः८० सेयर स्वाप रेसियो कायम हुने गरी आपसमा गाभिएका थिए । त्यसपछि संस्थाको कुल चुक्तापुँजी २८ करोड ५६ लाख २० हजार १६० रुपैयाँको २० प्रतिशत बोनस सेयर वितरण गरेको थियो । बोनस सेयर वितरणपछि संस्थाको चुक्तापुँजी ३४ करोड २७ लाख ४४ हजार १९२ रुपैयाँ पुगेको छ ।
अब संस्थाले सेयर संरचना ७०ः३० (संस्थापकःसर्वसाधारण) कायम हुने गरी जारी हुन बाँकी सेयर एफपीओद्वारा सर्वसाधारणमा जारी गर्न लागेको हो।
यसैबीच संस्थाले एफपीओ निष्काशन तथा बिक्री प्रबन्धकमा आरबीबी मर्चेन्ट बैंकिङ लिमिटेडलाई नियुक्त गरेको छ ।
वि.सं.२०७८ फागुन २४ मंगलवार १२:२७ मा प्रकाशित