काठमाडौं । एक दर्जन बढी कम्पनीहरुले वार्षिक साधारण सभाका लागि मिति तय गरेका छन् । हालसम्म १४ वटा कम्पनीहरुले साधारण सभाका लागि मिति तोकेका हुन् ।
यी मध्ये एक कम्पनीले भने विशेष साधारण सभा बोलएको छ । साधारण सभा बोलाएका अधिकांश कम्पनीहरुले लाभांश पारित गर्ने, आईपीओ निष्काशन, हकप्रद सेयर जारी गर्ने लगायत मर्जरसम्मका मुख्य एजेण्डा रहेको छ ।
केही कम्पनीका लगानीताहरुको भने खात खाली हुने भएको छ । सभा तथा लाभांश वितरण प्रयोजनका लागि केही कम्पनीहरुले बुक क्लोज समेत गरिसकेका छन् ।
सिटिजन्स लाइफ इन्स्योरेन्स
सिटिजन्स लाइफ इन्स्योरेन्स कम्पनीले आउँदो चैत ११ गते चौथो वार्षिक साधारण सभा गर्ने भएको हो ।
कम्पनीको फागुन १३ गते बसेको सञ्चालक समितिको बैठकले उक्त दिन साधारण सभा गर्ने निर्णय गरेको हो ।
सभामा आईपीओ निष्काशन गर्ने प्रस्ताव लैजाने भएको छ । सभामा कम्पनीको नियमावलीको नियममा आवश्यक संशोधन गर्ने र सो संशोधनमा नियमनकारी निकायबाट कुनै सुझाब आएमा सो सम्बन्धी काम गर्न सञ्चालक समितिलाई निर्देशन दिनेछ ।
सभाले आर्थिक वर्ष २०७६/७७ को वार्षिक प्रतिवेदन छलफल गरी पारित गर्नेछ । यसका साथै आव २०७७/७८ को लागि लेखापरीक्षकको नियुक्ति र निजको पारीश्रमिक निर्धारण गर्ने प्रस्ताव पनि पारित गर्नेछ ।
गरिमा विकास बैंक
गरिमा विकास बैंकले आउँदो चैत १८ गते साधारण सभा बोलाएको छ ।
बैंकले गत आर्थिक वर्षको मुनाफाबाट सेयरधनीहरुलाई वितरण गर्ने घोषणा गरेको लाभांश र थप संस्थापक सेयर निष्काशन गर्ने प्रस्ताव पारित गर्न सभा बोलाएको हो ।
बैंकले सहारा विकास बैंकलाई प्राप्ति गरेपश्चात कायम चुक्ता पूँजीको १६ प्रतिशत बोनस सेयर वितरण गर्ने घोषणा गरेको थियो ।
सभाले लाभांश प्रस्तावका साथै बोनस शेयरपश्चात कायम चुक्ता पूँजीको ५१ प्रतिशत संस्थापक सेयर कायम गर्न नपुगेको १ लाख ९ हजार ८११ कित्ता संस्थापक सेयर निष्काशन गर्ने, अन्य बैंक तथा वित्तीय संस्थासँग मर्ज तथा एक्विशिन सम्बन्धी कार्य गर्न सञ्चालक समितिलाई अख्तियारी दिने लगायतका प्रस्तावहरु पनि पारित गर्नेछ ।
साधारण सभा प्रयोजनार्थ बैंकले चैत ४ गतेदेखि १८ गतेसम्म बुकक्लोज गर्ने भएको छ ।
एनआइसी एसिया बैंक
एनआइसी एसिया बैंकले चैत २० गते वार्षिक साधारण सभा बोलाएको छ । बैंकले लाभांश प्रस्ताव बिनै साधारण सभा गर्न लागेको हो ।
यसअघि १५ प्रतिशत बोनस सेयर र कर प्रयोजनका लागि ०.७९ प्रतिशत नगद लाभांश दिने घोषणा गरेपनि नियामक नेपाल राष्ट्र बैंकले अस्वीकृत गरेपछि प्रस्तावित लाभांश रद्द भएको थियो ।
केन्द्रीय बैंकले क्यापिटल कन्जर्भेसन बफर पर्याप्त नदेखिएको भन्दै लाभांश प्रस्ताव अस्वीकृत गरेको थियो । सभा प्रयोजनका लागि चैत ८ गतेदेखि बुक क्लोज गरेको छ ।
नेपाल लाइफ इन्स्योरेन्स
नेपाल लाइफ इन्स्योरेन्स कम्पनीले चैत २१ गते सभा बोलाएको छ । कम्पनीले सभाले लाभांश पारित गर्ने मुख्य एजेण्डा रहेको छ ।
कम्पनीले हाल कायम चुक्ता पूँजीको १४ प्रतिशत बोनस सेयर र कर प्रयोजनार्थ ०.७३ प्रतिशत नगद लाभांश वितरण गर्ने प्रस्ताव पारित गरेको छ ।
सभाले हाल कायम पूँजी संरचनामा संस्थापक र सर्वसाधारण सेयरको ६० बराबर ४० अनुपातलाई परिवर्तन गरी ५१.४९ प्रतिशत कायम गर्नेछ ।
यसका साथै सञ्चालक समितिमा संस्थापक शेयरधनी समूह (क) बाट प्रतिनिधित्व गर्ने ४ जना सञ्चालकहरुको निर्वाचन गर्ने लगायतका प्रस्तावहरु पारित गर्नेछ ।
सामलिङ्ग पावर
सामलिङ्ग पावर कम्पनीले आउँदो चैत २१ गते तेस्रो वार्षिक साधारण सभा गर्ने भएको हो ।
सभाले गत आर्थिक वर्ष २०७७/७८ सम्मको वार्षिक प्रतिवेदन सहितका वित्तीय विवरणहरु पारित गर्नेछ ।
सोही दिन हुने सभाले चालु आर्थिक वर्षको लागि लेखापरीक्षक नियुक्ती र निजको पारिश्रमिक निर्धारण गर्नेछ ।
सभाले हाल कायम सञ्चालक समितिको संख्या ११ जनाबाट घटाएर ७ जना बनाउने र कम्पनीको नियमावलीमा आवश्यक संशोधन गर्ने प्रस्ताव पनि सभाका लागि तय गरेको छ ।
यसका साथै सर्वसाधारण सेयरधनी समूह ‘ख’ बाट एक जना तथा समूह ‘ग’ बाट एक जना गरी २ जना सञ्चालकको निर्वाचन गर्ने कार्यक्रम समेत सभाका लागि तय भएको छ ।
साधारण सभा प्रयोजनका चैत ७ गते (एक दिन) बुक क्लोज गरिसकेको छ ।
नेपाल टेलिकम
नेपाल टेलिकम लिमिटेडले साधारण सभाका लागि मिति तय गरेको छ । कम्पनीले पहिलो पटक लाभांश वितरण गर्नका लागि सभा बोलाएको हो ।
कम्पनीले आउँदो चैत २४ गते सभा गर्ने भएको छ । सभा त्रिभुवन आर्मी अफिसर्स क्लब, टुँडिखेलमा बिहान ११ बजे शुरु हुनेछ ।
सभामा कम्पनीले हाल कायम चुक्ता पूँजीको २० प्रतिशत बोनस सेयर र प्रतिकित्ता २० रुपैयाँ नगद लाभांश (कर सहित) वितरण गर्ने प्रस्ताव पारित गर्नेछ ।
साधारण सभा प्रयोजनार्थ कम्पनीले चैत ११ गतेदेखि २३ गतेसम्म बुकक्लोज गर्ने भएको छ ।
नेपाल आयल निगम
नेपाल आयल निगमको ४०औं वार्षिक साधारण सभा आउँदो चैत २५ गते हुने भएको छ ।
कम्पनीको चैत २ गते बसेको सञ्चालक समितिको बैठकले उक्त दिन सभा गर्ने निर्णय गरेको हो । सभा कम्पनीको सभाकक्ष टेकु, काठमाडौंमा दिउँसो १ बजे सुरु हुनेछ ।
सभाले सञ्चालक समितिको प्रतिवेदन पारित गर्ने, आर्थिक वर्ष २०७७/७८ को लेखापरीक्षकको नियुक्ति, पारिश्रमिक एवम् खर्च अनुमोदन गर्नेछ ।
यसका साथै आव २०७८/७९ को लागि लेखापरीक्षकको नियुक्ति र निजको पारिश्रमिक तोक्ने लगायतका प्रस्ताव पनि पारित गर्नेछ ।
जीवन विकास लघुवित्त
जीवन विकास लघुवित्त वित्तीय संस्थाले आउँदो चैत २५ गते तेस्रो वार्षिक साधारण सभा गर्ने निर्णय गरेको हो ।
सभामा लाभांश पारित गर्ने मुख्य एजेण्डा रहेको छ । सभाले आर्थिक वर्ष २०७७÷७८ को मुनाफाबाट सेयरधनीहरुलाई ७० प्रतिशत बोनस सेयर र करसहित ३.प्रतिशत नगद लाभांश वितरण गर्ने प्रस्ताव पारित गर्नेछ ।
सभामा कम्पनीले अन्य कुनै इजाजत प्राप्त बैंक तथा वित्तीय संस्थासँग गाभ्ने गाभिने तथा प्राप्ति गर्न परेमा सो सम्बन्धी सम्पूर्ण कार्य गर्न सञ्चालक समितिलाई अख्तियारी प्रदान गर्ने प्रस्ताव रहेको छ ।
यस्तै, अन्य प्रस्तावमा सर्वसाधारण शेयरधनीको तर्फबाट प्रतिनिधित्व गर्ने दुई जना सञ्चालकको निर्वाचन गर्ने, कम्पनीको अधिकृत, जारी तथा चुक्ता पूँजी वृद्धि गर्ने, कम्पनीको प्रवन्धपत्र र नियमावलीमा संशोधन गर्ने सम्पूर्ण कार्य गर्न सञ्चालक समितिलाई अख्तियारी प्रदान गर्ने रहेको छ ।
साधारण सभा तथा लाभांश वितरण प्रयोजनका चैत १२ गतेदेखि २५ गतेसम्म बुक क्लोज गर्ने तयारी कम्पनीको छ ।
मुक्तिनाथ क्यापिटल
मुक्तिनाथ क्यापिटलले भने आउँदो चैत २५ गते विशेष साधारण सभा गर्ने भएको हो ।
कम्पनीको चैत ८ गते बसेको सञ्चालक समितिको बैठकले उक्त दिन सभा गर्ने निर्णय गरेको हो । सभा कम्पनीको केन्द्रीय कार्यालय, काठमाडौं प्लाजा, कमलादीमा साढे १२ बजे भर्चुअल माध्यमबाट सुरु हुनेछ ।
सभा कम्पनीको रजिष्टर्ड कार्यालयको ठेगाना परिवर्तन गर्ने र प्रवन्धपत्रमा प्रस्तावित संशोधनको नियमनकारी निकायबाट थपघट गर्न कुनै निर्देशन आएमा उक्त कार्य गर्न सञ्चालक समितिलाई अख्तियारी प्रदान गर्ने प्रस्ताव रहेको छ ।
आरम्भ चौतारी लघुवित्त
आरम्भ चौतारी लघुवित्त वित्तीय संस्थाले चैत २७ गते वार्षिक साधारण सभा बोलाएको छ ।सभामा गत वर्षको नाफाबाट २१ प्रतिशत बोनस सेयर वितरण गर्ने प्रस्ताव पारित हुनेछ ।
बोनस सेयर वितरणपछि चुक्ता पुँजी वृद्धि हुने भएकोले प्रबन्धपत्र तथा नियमावली संसोधन गर्ने एजेन्डा समेत रहेको छ ।
यस्तै, आर्थिक वर्ष २०७७/७८ को वासलात, नाफा–नोक्सान र नगद प्रवाहमाथि छलफल हुने लगायत बिभिन्न एजेण्डा रहेका छन् ।
सभा बनेपा पार्टी भेन्यु, काभ्रपलाञ्चोेकमा बिहान ११ बजे सुरु हुनेछ । सभा प्रयोजनका लागि कम्पनीले चैत १७ गतेदेखि २७ गतेसम्म बुक क्लोज गर्ने भएको छ ।
तारागाउँ रिजेन्सी होटल
तारागाउँ रिजेन्सी होटलको फागुन २० गते बसेको संचालन समितिको बैठकले २५औं साधारण सभा चैत २७ गते गर्ने निर्णय गरेको छ ।
सभाको प्रस्तावमा २०७७/७८ को वार्षिक प्रतिवेदन छलफल गरी पारित गर्ने र २०७८/७९ को लागि लेखापरीक्षकको नियुक्ती र निजको पारिश्रमिक निर्धारण गर्ने रहेको छ ।
यस्तै, सभामा कम्पनीको सञ्चालक समितिमा प्रतिनिधित्व गर्ने सञ्चालकको नियुक्तीलाई अनुमोदन गर्ने, प्रबन्ध सञ्चालक र कार्यकारी सञ्चालकको पुनः नियुक्तीलाई अनुमोदन गर्ने लगायतका प्रस्ताव रहेको छ ।
साधारण सभा प्रयोजनका कम्पनीले चैत १२ गतेदेखि २७ गतेसम्म बुक क्लोज गर्ने भएको छ ।
सिद्धार्थ इन्स्योरेन्स
सिद्धार्थ इन्स्योरेन्स कम्पनीले २०औं वार्षिक साधारण सभा आउँदो चैत ३० गते गर्ने भएको छ ।
कम्पनीको चैत ८ गते बसेको सञ्चालक समितिको बैठकले उक्त दिन सभा गर्ने निर्णय गरेको हो । सभामा लाभांश पारित गर्ने मुख्य एजेण्डा रहेको छ ।
सभाले सेयरधनीलाई १५ प्रतिशत बोनस सेयर र कर प्रयोजनका लागि ०.७८९५ प्रतिशत नगद लाभांश वितरण गर्ने प्रस्ताव पारित गर्नेछ ।
सभामा स्वतन्त्र (विज्ञ) सञ्चालकको नियुक्ती अनुमोदन गर्ने, कम्पनीको प्रवन्धपत्र र नियमावलीमा संशोधन गर्ने प्रस्तावहरु रहेका छन् ।
यसका साथै सभाले निर्जीवन बीमा व्यवसाय गर्ने उपयुक्त कम्पनीसँग गाभ्ने गाभिने तथा प्राप्ति गर्न परेमा सो सम्बन्धी सम्पूर्ण कार्य गर्न सञ्चालक समितिलाई अख्तियारी प्रदान गर्नेछ ।
साधारण सभा तथा लाभांश प्रयोजनका लागि कम्पनीले चैत १७ गते (एक दिन) बुक क्लोज गर्ने भएको छ ।
साल्ट ट्रेडिङ कर्पोरेशन
साल्ट ट्रेडिङ कर्पोरेशनले ५५औं वार्षिक साधारण सभा चैत ३० गते गर्ने भएको छ ।
कम्पनीको चैत ६ गते बसेको संचालनक समितिको बैठकले उक्त दिन सभा गर्ने निर्णय गरेको हो । सभामा लाभांश पारित गर्ने मुख्य एजेण्डा रहेको छ ।
सभाले आर्थिक २०७७/७८ को नाफाबाट प्रस्तावित १० प्रतिशत बोनस सेयर र कर प्रयोजनका लागि ०.५० प्रतिशत नगद लाभांश वितरण गर्ने प्रस्ताव पारित गर्नेछ ।
सोही सभाले आव २०७८/७९ को लागि लेखापरिक्षकको नियुक्ती गर्ने प्रस्ताव पनि पारित गर्ने निजको पारिश्रमिक अनुमोदन गर्नेछ ।
उक्त साधारण सभा र लाभांश वितरण प्रयोजनको चैत १५ गते देखि ३० गते सम्म बुक क्लोज गर्ने जानकारी गराएको छ ।
नेपाल फाइनान्स
नेपाल फाइनान्सले आउँदो वैशाख ३ गते २९औं वार्षिक साधारण सभा गर्ने भएको हो । कम्पनीले यस वर्ष पनि लाभांश प्रस्ताव गरेको छैन ।
कम्पनीले आर्थिक वर्ष २०६७/६८ को मुनाफाबाट २२ प्रतिशत बोनस सेयर र कर प्रयोजन समेतका लागि १.१६ प्रतिशत नगद लाभांश वितरण गरेको थियो । तर, त्यसपछिका वर्षहरुमा कम्पनीले लाभांश वितरण गरेको छैन ।
सभाले गत आर्थिक वर्ष २०७७/७८ सम्मको वार्षिक प्रतिवेदन सहितका वित्तीय विवरणहरु पारित गर्नुका साथै चालु आवको लागि लेखापरीक्षक नियुक्ती र निजको पारिश्रमिक निर्धारण गर्नेछ ।
सभामा अन्य कुनै उपयुक्त बैंक तथा वित्तीय संस्थासँग मर्जर तथा प्राप्ति प्रक्रियामा जाने भएमा त्यसको सम्पूर्ण अख्तियारी सञ्चालक समितिलाई दिने विशेष प्रस्ताव रहेको छ
यस्तै, सभामा संस्थापकतर्फबाट चार जना र सर्वसाधारण तर्फबाट एक जना सञ्चालकहरुको निर्वाचनको कार्यक्रम पनि तय भएको छ ।
साधारण सभा प्रयोजनका लागि कम्पनीले चैत १७ गते एक दिन बुक क्लोज गर्ने भएको छ ।
वि.सं.२०७८ चैत १० बिहीवार १८:०५ मा प्रकाशित
