काठमाडौं । चालु आर्थिक वर्ष २०७८/७९ को आठ महिनाको अवधिमा ४० अर्ब बढीको सुनचाँदी आयात भएको छ ।
भन्सार विभागले हालै प्रकाशित गरेको चालु आवको फागुन मसान्तसम्मको तथ्याङ्कले यस्तो देखाएको हो । विभागका अनुसार उक्त अवधिमा ४० अर्ब ९६ करोड ७७ लाख ६६ हजार रुपैयाँ बरारबको सुनचाँदी आयात भएको हो ।
उक्त अवधिमा ४ हजार ४४ केजी बढी सुन र १ लाख ३५ हाजर ३३९ केजी चाँदी नेपाल भित्रिएको हो । नेपालमा टर्की र युनाईट अरब इमिरेट्स (यूएई)बाट सुन आयात हुने गरेको छ ।
चालु आवको फागुन मसान्तसमम्मा २८ अर्ब १७ करोड ३२ लाख २७ हजार रुपैयाँ बराबरको सुन आयात भएको छ । जसमध्ये सबैभन्दा बढी सुन यएईबाट आयात भएको छ । उक्त देशबाट २२ अर्ब २४ करोड ४४ लाख ७८ हजार रुपैयाँ बराबरको सुन आयात भएको विभागले जनाएको छ ।
फागुन मसान्तसम्ममा टकीबाट भने ५ अर्ब ९२ करोड ८७ लाख ५० हजार रुपैयाँ बराबरको सुन आयात भएको हो । सुन आयातबाट सरकारले ३ अर्ब ४३ करोड ७८ लाख ३० हजार रुपैयाँ राजश्व संकलन गरेको छ ।
यस्तै, उक्त अवधिमा विश्वको आठ मुलुकहरुबाट १२ अर्ब ७९ करोड ४५ लाख ३९ हजार रुपैयाँ बराबरको चाँदी आयात भएको छ ।
नेपालमा चीन, हङकङ, भारत, इन्डोनेशिया, सिंगापुर, स्वीटजरल्याण्ड, टर्की र यूएईबाट चाँदी आयात हुने गरेको छ । चाँदी आयातबाट सरकारले १ अर्ब २१ करोड ७ लाख ४८ हजार रुपैयाँ राजश्व संकलन गरेको छ ।
चालु आवको आठ महिनाको अवधिमा सबैभन्दा बढी चाँदी स्वीटजरल्याण्डबाट आयात भएको छ । उक्त देशबाट ५ अर्ब १ करोड ३० लाख ३८ हजार रुपैयाँ बराबरको चाँदी नेपाल भित्रिएको हो ।
यस्तै, यूएईबाट ३ अर्ब ६० करोड ८८ लाख ९५ हजार, चीनबाट १ अर्ब ८२ करोड ४४ लाख ६३ हजार, हङकङबाट १ अर्ब ५२ करोड १४ लाख ६१ हजार रुपैयाँ बराबरको चाँदी आयात भएको छ ।
त्यसैगरि चालु आवको फागुन मसान्तसम्ममा टर्कीबाट ६३ करोड २७ लाख ३९ हजार, इन्डोनेशियाबाट १९ करोड २६ लाख ६० हजार, भारतबाट ७ लाख ५२ हजार र सिंगापुरबाट ५ लाख ३० हजार रुपैयाँ बराबरको चाँदी आयात भएको हो ।
वि.सं.२०७८ चैत १३ आइतवार १३:३५ मा प्रकाशित