काठमाडौं । चैत २० गते आइतबार ग्रीन भेञ्चर्स कम्पनीको आईपीओ बाँडफाँड भयो । कम्पनीले चैत ८ गते मंगलबारदेखि २१ गतेसम्म सर्वसाधारणका लागि आईपीओ निष्काशन गरेको थियो ।
कम्पनीको सेयर भाग्यमानी २ लाख ८७ हजार ५ सय जनाले १०/१० कित्ता पाएका छन् । कम्पनीको आईपीओ गोलाप्रथाबाट बाँडफाँड भएको थियो ।
कम्पनीको आइपीओ अहिले सूचीकरण प्रक्रियामा रहेको छ । कम्पनीको आइपीओले पहिलो कारोबारको लागि ९१ रुपैयाँ ६ पैसादेखि २७५ रुपैयाँ ४ पैसासम्म ओपन रेञ्ज पाउने देखिएको छ ।
कम्पनीको आर्थिक वर्ष २०७७/७८ को बास्तविक प्रतिसेयर नेटवर्थ ९१ रुपैयाँ ८६ पैसा रहेको छ । जसका आधारमा कम्पनीको आईपीओले पहिलो कारोबारका लागि ९१ रुपैयाँ ६ पैसादेखि २७५ रुपैयाँ ४ पैसासम्म ओपन रेञ्ज पाउने देखिएको हो । नेपाल स्टक एक्सचेञ्ज (नेप्से) ले पहिलो कारोबारको लागि नेटवर्थको तीन गुणासम्म मूल्य रेञ्ज तोक्ने गर्दछ ।
कम्पनीको आईपीओमा २१ लाख ५७ हजार ६ सय ३१ जना आवेदकहरुले २ करोड ५९ लाख ४० हजार ५ सय ६० कित्ताका लागि आवेदन दिएका थिए ।
कम्पनीले प्रतिकित्ता १०० रुपैयाँ अंकित दरका ३१ करोड २५ लाख रुपैयाँ बराबरको ३१ लाख २५ हजार ७ सय ५० कित्ता आईपीओ निष्काशन गरेको हो । जसमध्ये जारी पूँजीको ३ प्रतिशत अर्थात ९३ हजार ७ सय ५० कित्ता सेयर कर्मचारीहरुका लागि, ५ प्रतिशत अर्थात १ लाख ५६ हजार २ सय ५० कित्ता सेयर सामूहिक लगानी कोषका लागि र २८ लाख ७५ हजार कित्ता साधारण सेयर सर्वसाधारणका लागि छुट्याइएको थियो ।
कम्पनीको आईपीओ निष्काशन तथा बिक्री प्रबन्धकमा लक्ष्मी क्यापिटल लिमिटेड रहेको छ ।
वि.सं.२०७८ चैत २५ शुक्रवार ११:४५ मा प्रकाशित