काठमाडौं । गलकोट नगरपालिकाका प्रमुख पदका उम्मेदवार पूर्ण काउचाले गलकोट नगरभित्रका भलिवल खेलाडीलाई मासिक ५ हजार भत्ता प्रदान गर्ने घोषणा गर्नुभएको छ ।
नेकपा एमालेका तर्फबाट गलकोट नगरप्रमुखमा उम्मेदवारी दिएका काउचाले गलकोट नगरभित्रका भलिवल खेल र खेलाडीको प्रोत्साहन स्वरुप मासिक ५ हजार भत्ता प्रदान गरिने बताउनुभएको हो ।
उहाँका अनुसार गलकोटमा भलिबल खेलको वृद्धि विकासका लागि भलिबल एकेडेमी संञ्चालन गरि नगर स्तरीय समूह छनौट गरेने र छनौट खेलाडिलाई प्रोत्साहन स्वरुप मासिक भत्ता प्रदान गरिने छ ।
काउचाले यसअघि नै नगरपालिकाको नगर प्रमुख निर्वाचित भएको खण्डमा सेवा सुविधा नलिने समेत घोषणा गरिसक्नुभएको छ ।
उहाँले निर्वाचनमा जितेपछि आउने नगर प्रमुखको तलब भत्ता नगरपिभत्रका गरिब, असाहय तथा महिला तथा बालबालिकाको नाममा खर्चिने प्रतिवद्धता जनाउनुभएको छ ।
“मेरो चुनावको पहिलो प्रतिबद्धता सेवा सुविधाको रुपमा आएको रकम कोषमा जम्मा गरेर महिला तथा बालबालिकाको हितमा खर्च गर्नेछु” काउचाले भन्नुभयो,-“राजनीति पेशा होइन, सेवा हो, यसलाई पेशाका रुपमा लिन हुँदैन, नगरपालिकामा आफ्नो जीत पश्चात आएको सेवा सुविधा नगरका महिला, असाहय तथा बालबालिकाको हितका लागि नगरको कोषमा जम्मा गरेर खर्च गर्नेछु ।”
वि.सं.२०७९ वैशाख १८ आइतवार १५:०९ मा प्रकाशित
