काठमाडौं । गत विहीबार अर्थात बैशाख १५ गते सीवाईसी नेपाल लघुवित्त वित्तीय संस्थाको आईपीओ बाँडफाँड भईसकेको छ ।
कम्पनीको आईपीओमा मागभन्दा बढी आवेदन परेकाले गोलाप्रथा विधिबाट १० कित्ताका दरले बाँडफाँड गरिएको थियो ।
कम्पनीको आईपीओ ३६ हजार ९४८ जना सर्वसाधारणले १०/१० कित्ता सेयर हात पारेका छन् । यीमध्ये भाग्यमानी ८ जनाले थप १/१ कित्ता सेयर पाएका छन् ।
कम्पनीले ३ करोड ९५ लाख ३३ हजार ६०० रुपैयाँ बराबरको ३ लाख ९५ हजार ३३६ कित्ता आईपीओ निष्काशन गरेको हो । कम्पनीले गत वैशाख २ गतेदेखि ६ गतेसम्म उक्त आईपीओ निष्काशन गरेको थियो ।
कम्पनीले निष्काशन गरेको कुल सेयरमध्ये ६ हजार ८२ कित्ता कर्मचारीहरुका लागि र १९ हजार ७६६ कित्ता सामूहिक लगानी कोषहरुलाई सुरक्षित गरिएको छ भने बाँकी ३ लाख ६९ हजार ४८८ कित्ता सर्वसाधारणका लागि छुट्याएको थियो ।
कम्पनीको आईपीओ यति बेला सूचीकरणको प्रक्रियामा रहेको छ । कम्पनीको आईपीओ पहिलो कारोबारका लागि ३५५ रुपैयाँ ३६ पैसादेखि १ हजार ३३ रुपैयाँ ८ पैसा ओपन रेञ्ज पाउने देखिएको छ ।
कम्पनीको आर्थिक वर्ष २०७७/७८ को वास्तविक प्रतिसेयर नेटवर्थ २४४ रुपैयारुँ ३६ पैसा रहेको छ । जसका कारण कम्पनीको आईपीओले पहिलो कारोबारका लागि ३५५ रुपैयाँ ३६ पैसादेखि १ हजार ३३ रुपैयाँ ८ पैसा ओपन रेञ्ज पाउने देखिएको हो । नेपाल स्टक एक्सचेञ्ज (नेप्से)ले पहिलो कारोबारका लागि प्रतिसेयर नेटवर्थको तीन गुणासम्म ओपन रेञ्ज तोक्ने गर्दछ ।
सीडीएसका अनुसार यसमा २ अर्ब ५७ करोड ६१ लाख ९० हजार रुपैयाँ बराबरको आवेदन परेको थियो । यो आइपीओमा २२ लाख ८४ हजार ८४९ जनाले २ करोड ५७ लाख ६१ हजार ९०० कित्ताका लागि आवेदन दिएका छन् । यो आवेदन सर्वसाधारणबाट माग गरिएको भन्दा ६९.७२ गुणा बढी हो ।
कम्पनीको आईपीओ निष्काशन तथा बिक्री प्रबन्धकमा ग्लोबल आइएमई क्यापिटल लिमिटेड रहेको छ ।
वि.सं.२०७९ वैशाख २० मंगलवार १३:०१ मा प्रकाशित
