काठमाडौं । बलेफी हाइड्रोपावर कम्पनीको आईपीओ नेपाल स्टक एक्सचेञ्ज (नेप्से) मा सूचीकृत भएको छ ।
मंगलबार कम्पनीको १ करोड ८२ लाख ७९ हजार ७ सय कित्ता सेयर नेप्सेमा सूचीकृत भएको छ ।कम्पनीको स्टक सिम्बोल बिएचएल रहेको छ । उक्त सेयर दोस्रो बजारमा बुधवारदेखि कारोबारमा आउनेछ ।
कम्पनीको आईपीओले पहिलो कारोबारका लागि ९३ रुपैयाँ ६४ पैसादेखि २ सय ८० रुपैयाँ ९२ पैसासम्म ओपनिङ रेञ्ज पाउने देखिएको छ ।
कम्पनीको आर्थिक वर्ष २०७७/७८ को प्रतिसेयर नेटवर्थ ९३ रूपैयाँ ६४ पैसा रहेको छ । जसकारण कम्पनीको आईपीओ उक्त ओपन रेञ्ज पाउने देखिएको हो । नेप्सेले हरेक कम्पनीको पहिलो कारोबारको लागि वास्तविक नेटवर्थको तीन गुणासम्म ओपनिङ रेञ्ज तोक्ने गर्दछ ।
कम्पनीले चैत्र १६ गतेदेखि प्रतिकित्ता १०० रुपैयाँ अंकित दरका १८ करोड २७ लाख ९७ हजार रुपैयाँ बराबरको १८ लाख २७ हजार ९ सय ७० कित्ता आईपीओ निष्काशन गरेको थियो ।
जसमध्ये ७३ हजार १ सय १९ कित्ता सेयर कर्मचारीहरुका लागि, ९१ हजार ३ सय ९८ कित्ता सेयर सामूहिक लगानी कोषका लागि र बाँकी १६ लाख ६३ हजार ४५३ कित्ता सर्वसाधारणका लागि छुट्याइएको थियो ।
कम्पनीको सेयर १ लाख ६६ हजार ३ सय ४२ जनाले १०/१० कित्ता प्राप्त गरेका छन् । यीमध्ये ३ जनाले भने थप १/१ कित्ता सेयर पाएका छन् ।
कम्पनीको आईपीओमा चैत्र २१ गतेसम्म २२ लाख ६९ हजार ४ सय १६ जनाले २ अर्ब ६२ करोड २२ लाख ९७ हजार रूपैयाँ बराबरको २ करोड ६२ लाख २२ हजार ९ सय ७० कित्ताका लागि आवेदन दिएका थिए ।
वि.सं.२०७९ जेठ १० मंगलवार १४:४७ मा प्रकाशित
