काठमाडौं । भोलि अर्थात जेठ २८ गते दुई कम्पनीको साधारण सभा हुने भएको छ ।
उक्त दिन किसान लघुवित्त वित्तीय संस्था र जाल्पा सामुदायिक लघुवित्त वित्तीय संस्थाले वार्षिक साधारण सभा गर्ने भएका हुन् ।
उक्त दिन लाभांश वितरणको मुख्य प्रस्ताव पारित गर्न किसान लघुवित्तले सभा बोलाएको हो ।
कम्पनीको सभाले गत आर्थिक वर्ष २०७७/७८ सम्मको वार्षिक प्रतिवेदन सहितका वित्तीय विवरणहरु पारित गर्नुका साथै प्रस्तावित २० प्रतिशत बोनस सेयरलाई समेत अन्तिम रुप दिनेछ ।
यस अघि कम्पनीले २५ प्रतिशत बोनस सेयर वितरणको प्रस्ताव गरेको थियो । राष्ट्र बैंकको निर्देशन बमोजिम कम्पनीले लाभांश प्रस्ताव संशोधन गरेको हो ।
कम्पनीले हाल कायम चुक्तापूँजी ३९ करोड २८ लाख ८ हजार रुपैयाँको आधारमा उक्त बोनस सेयर वितरण गर्न लागेको हो ।
कम्पनीले थप सर्वसाधारणलाई सेयर निष्काशन गर्ने प्रस्ताव पनि सभाका लागि तय गरेको छ ।
साथै अन्य लघुवित्त वित्तीय संस्थासँग मर्जर तथा प्राप्ती प्रकृयामा जाने भएमा त्यसको सम्पूर्ण जिम्मेवारी सञ्चालक समितिलाई दिने निर्णय पनि सभाले गर्नेछ ।
सभा प्रयोजनका लागि कम्पनीले जेठ २० गते एक दिन बुक क्लोज गर्ने भएको छ । यस्तै, जाल्पा सामुदायिक लघुवित्तको तेस्रो वार्षिक साधारण सभा पनि भोलि हुँदैछ ।
कम्पनीको जेठ १ गतेको सञ्चालक समितिको बैठकले बुटवल, रुपन्देहीमा सभा गर्ने निर्णय गरेको हो ।
गत माघमा सर्वसाधारणका लागि आईपीओ जारी गरेको कम्पनीले पहिलो वर्ष लाभांश नदिने भएको छ ।
साधारण सभा प्रयोजनका लागि भने जेठ १२ गतेदेखि सभा हुने दिनसम्म बुक क्लोज गर्ने मिति कम्पनीले तय गरिसकेको छ ।
वि.सं.२०७९ जेठ २७ शुक्रवार १६:०१ मा प्रकाशित