काठमाडौं । अर्थमन्त्रालयले अन्नपूर्ण पोष्ट दैनिकमा प्रकाशित समाचारप्रति ध्यानाकर्षण गराएको छ ।
जेठ ३० गते प्रकाशित मध्यराति बजेटमा जब चुकुल लाग्यो शिर्षकमा प्रकाशित समाचारप्रति गम्भिर ध्यानाकर्षण भएको जनाएको छ ।
अन्नपूर्ण पोष्टले अर्थमन्त्री जनार्दन शर्माले बजेट भाषणको अघिल्लो रात आफ्ना नजिकका दुई जना ‘विज्ञ’ नाम दिएर बजेटका राजस्व दरमा तलमाथि गरेको समाचार छापेको थियो । तर, शर्माले झिकाएका दुईमध्ये एकजना नायब सुब्बा भएका पुष्टि भएको थियो। ती रघुनाथ घिमिरे नाम गरेका नायब सुब्बाले अर्थ मन्त्रालयकै भन्सार विभागबाट २०७५ फागुन १ गते पदबाट राजीनामा दिएका थिए ।
उक्त घटनाबारे मन्त्रालयले २०७८ चैत्र १ गते देखि नै औपचारिक रुपमा बजेट तथा कार्यक्रमका विषयमा क्षेत्रगत छलफल, विज्ञहरू तथा अन्य सरोकारवाला निकायसँग परामर्श र अन्तरक्रिया प्रारम्भ गरेको उल्लेख गर्दै मन्त्रालयका सहसचिवको नेतृत्वमा बजेट मस्यौदा समिति गठन गरेको मन्त्रालयले जनाएको छ ।
यसका साथै सर्वसाधारणको प्रतिक्रिया, सुझावहरू संकलनका लागि मन्त्रालयमा ११३८ को निःशुल्क टोल फ्री नं व्यवस्थासहित आर्थिक वर्ष २०७९/८० को बजेटसम्बन्धी राय सुझाव संकलन कक्षसमेत स्थापना गरी बजेट निर्माणको कार्यलाई विगत वर्षहरूभन्दा फरक तवरबाट बढी जनअपनत्व बनाउने गरी अर्थ मन्त्रीको नेतृत्वमा मन्त्रालयको सम्पूर्ण टिम औपचारिक रुपमा बजेट लेखन र निर्माणमा निरन्तर खटेको जनाएको छ ।
मुलुकको अर्थतन्त्रको विकास र सुधारका बिषयमा निरन्तर क्रियाशिल रहेका अर्थ मन्त्रीका बारेमा भ्रम सृजना हुने गरी तथ्य र तर्कभन्दा टाढा रही कपोलकल्पित र भ्रमपूर्ण समाचार प्रकाशित भएको जनाएको छ ।
विज्ञप्तिमा भनिएको छ, ‘सोही क्रममा बजेटलाई अन्तिम रुप दिने सन्दर्भमा जेठ १४ गते बिहानैदेखि मन्त्रालयमा अर्थ मन्त्रीको नेतृत्वमा सचिव, सचिव (राजस्व) र मन्त्रालयका सम्वन्धित महाशाखा प्रमुखहरु तथा भन्सार विभाग र आन्तरिक राजस्व विभागका महानिर्देशक समेतको सहभागितामा विनियोजन विधेयक, आर्थिक विधेयक, राष्ट्र ऋण उठाउने विधेयक, ऋण तथा जमानत विधेयक लगायतका बजेटसंग सम्वन्धित विषयहरु तयारी भएको र यस प्रक्रियामा तोकिएका जिम्मेवार पदाधिकारीहरु बाहेक अरु कसैको सहभागिता नरहेको सबैमा जानकारी गराउँदछौ ।’
वि.सं.२०७९ जेठ ३० सोमवार १८:४९ मा प्रकाशित