काठमाडौं । नबिल बैंकले नेपाल बङ्गलादेश (एनबी) बैंकलाई गाभ्ने भएको छ । नेपाल बङ्गलादेश (एनबी) लाई गाभ्नका लागि नबिलले नेपाल राष्ट्र बैंकबाट अन्तिम स्वीकृति पाएको छ ।
राष्ट्र बैंकको आज अर्थात असार १५ गते बसेको सञ्चालक समितिको बैठकले एनबि बैंकलाई गाभ्न नबिललाई अन्तिम स्वीकृत प्रदान गरेको हो ।
नबिल बैंकले एनबी बैंकलाई १००ः४३ स्वाप अनुपातमा गाभ्न लागेको हो । नबिल बैंकको १०० कित्ता बराबर एनबि बैंकका सेयरधनीहरुले ४३ कित्ता सेयर पाउनेछन् । मर्जरमा गएपछि बैंकले असार मसान्तभित्र एकीकृत कारोबार गर्ने तयारी रहेको बताइएको छ ।
नेपाल बङ्गलादेश बैंकलाई प्राप्ति गरेपश्चात नबिल बैंकको चुक्ता पूँजी २२ अर्ब ८३ करोड २९ लाख ८ हजार रुपैयाँ पुग्नेछ भने कर्जा रकम ३०९ अर्ब र निक्षेप रकम ३२० अर्ब रुपैयाँ पुग्नेछ ।
नबिल बैंकले नेपाल बंगलादेश बैंक गाभ्न गत पुस २९ गते प्रारम्भिक सम्झौता गरेको थियो ।
नेपालको बैंकिंग सेवामा अग्रणी स्थानमा रहदै आएको नबिल बैंकले नेपाल बङ्गलादेश बैंकलाई प्राप्ति गरेपश्चात बाणिज्य बैंकहरु मध्ये नबिल बैंकको निक्षेप, कर्जा, गैर व्याज आम्दानी, गैरकोषमा आधारित व्यबसाय, तथा कुल नाफा लगायतका विभिन्न सूचकांकहरुमा अग्रणी स्थानमा सुनिश्चित गर्नेछ ।
वि.सं.२०७९ असार १५ बुधवार १७:५४ मा प्रकाशित