काठमाडौं । विदेशी मुलुकहरुमा सुनका नेपाली मौलिक गहनाको माग बढ्दोक्रममा छ । पछिल्लो समयमा नेपालबाट सुनका मौलिक गहना निर्यात बढ्न थालेको हो ।
गत आर्थिक वर्ष २०७८/७९ मा नेपालबाट ५३ करोड बढीको सुनका गहना विदेशी मुलुकहरुमा पुगेको छ ।
भन्सार विभागले हालै सार्वजनिक गरेको गत आवको तथ्याङ्क अनुसार नेपालबाट एक वर्षको अवधिमा ५३ करोड २७ लाख ८६ हजार रुपैयाँ बराबरको सुनका गहना निर्यात भएको हो । गत आवको असार मसान्तसम्ममा नेपालबाट ६१ केजी बढी सुनका गर गहना बाहिरिएको हो ।
नेपालबाट विश्वका तीन मुलुक अमेरिका, अष्ट्रेलिया र हङकङमा सुनका नेपाली मौलिक गहना निर्यात हुने गरेको छ । सुनका गहना अघिल्लो आव २०७७/७८ देखि नेपालबाट निर्यात हुन थालेको हो ।
अघिल्लो आवमा ३८ करोड ७१ लाख ७६ हजार रुपैयाँ बराबरको सुनका गहना निर्यात भएको गत आवमा भने ३७.६० प्रतिशतले वृद्धि भएको हो ।
विशेषगरी विदेशी मुलुकमा बन्न नसक्ने नेपाली मौलिक गर–गहना नेपालबाट निर्यात हुने गर्दछ । भन्सार विभागका अनुसार पछिल्लो समयमा नेपालीहरुको बसोबास बढी भएका मुलुकहरुमा गहना निर्यात हुने गरेको छ ।
गत आवमा सबैभन्दा बढी सुनका गहना अमेरिका निर्यात भएको छ । उक्त अवधिमा ४६ करोड ११ लाख ३८ हजार रुपैयाँ बराबरको ५२ केजी बढी सुन गहना अमेरिका पुगेको हो ।
अघिल्लो आवमा भने अमेरिकामा २८ करोड ६० लाख ९६ हजार रुपैयाँ बराबरको ३० केजी बढी सुनका मौलिक गहना निर्यात भएको थियो ।
यस्तै, गत आवमा हङकङमा भने ५ करोड २७ लाख ८८ हजार रुपैयाँ बराबरको ६ हजार ७१९ ग्राम सुनका मौलिक नेपाली गहना निर्यात भएको विभागले जनाएको छ ।
विभागका अनुसार उक्त अवधिमा अष्ट्रेलियामा भने १ करोड ८८ लाख ५९ हजार रुपैयाँ बराबरको १ हजार ५६१ ग्राम सुनका मौलिक नेपाली गहना निर्यात भएको छ ।
वि.सं.२०७९ साउन १० मंगलवार १८:०५ मा प्रकाशित
