काठमाडौं । युनिलिभर नेपालले डेढ अर्ब नाफा कमाएको छ । कम्पनीले प्रकाशित गरेको गत आर्थिक वर्ष २०७८/७९ चौंथो त्रैमासिक वित्तीय विवरणले यस्तो देखाएको हो ।
गत आवमा कम्पनीले १ अर्ब ४९ करोड ९४ लाख रुपैयाँ नाफा कमाएको छ । जुन अघिल्लो आवको सोही अवधिको तुलनामा भने ७४.१७ प्रतिशतले बढी हो । अघिल्लो आवमा कम्पनीको नाफा ८६ करोड ९ लाख रुपैयाँ रहेको थियो ।
उक्त अवधिमा कम्पनीको आम्दानी पनि २७.९७ प्रतिशतले वृद्धि भई ७ अर्ब ३३ करोड ३६ लाख रुपैयाँ पुगेको छ । अघिल्लो आवको सोही अवधिमा कम्पनीको यो आम्दानी ५ अर्ब ७३ करोड ७ लाख रुपैयाँ मात्र रहेको थियो ।
गत आवमा कम्पनीको अन्य आम्दानी १०९ प्रतिशतले वृद्धि भएको भने कुल आम्दानी ७ अर्ब ४५ करोड ६६ लाख रुपैयाँ रहेको छ ।
कम्पनीको प्रतिसेयर आम्दानी पनि ९३४ रुपैयाँ ७४ पैसाले वृद्धि भई १ हजार ६२८ रुपैयाँ १ पैसा कायम भएको छ । प्रतिसेयर नेटवर्थ पनि ३ हजार ९४२ रुपैयाँ कायम भएको छ ।
कम्पनीको चुक्ता पुँजी ९ करोड २१ लाख रुपैयाँ रहेको छ ।
वि.सं.२०७९ साउन २३ सोमवार ११:५५ मा प्रकाशित